«Zhas Project» аясында 285 әлеуметтік жоба іске асырылды

«Жастар жылында» ерекше атап өтер жетістік - Маңғыстау өңірінде ҚР Білім және ғылым министрлігі мен Дүниежүзілік банкі бірлескен «Zhas Project» жобасының сәтті жүзеге асырылуы. Әлеуметтік жобаға 14-29 жас аралығындағы әлеуметтік аз қамтылған отбасыдан шыққан, жұмыссыз, орта арнаулы не жоғары білімі жоқ, табысы төмен жастар қатысты. Халықтың өмір сапасын жақсарту, әлеуметтік аз қамтылған отбасыларға қаржылай қолдау танытуды көздеген бастама аясында 285 жоба іске қосылды. Қорыта айтқанда, Маңғыстау жастарының әлеуметтік жобаларын қаржыландыруға 566 млн. теңге көлемінде қаражат жұмсалды. Әрине, ізгі бастама көп ұзамай өз игілігімен бөлісіп, жемісін бере бастады. Қауырт жұмыс нәтижесінде ет және сүт өнімдерін өндіру, жылыжайларда көкөніс пен бақша дақылдарын өсіру, құс еті мен жұмыртқаны сатылымға шығару бағытында 93 шағын шаруашылық іске қосылды. Сонымен қоса, 26 білім беру орталықтары, 17 демалыс орталығы мен шығармашылық үйірмесі, 19 спорт орталығы мен фитнес клубы, 24 наубайхана мен кондитерлік дүкендер, 29 тігін және аяқ киім шеберханасы, 5 сұлулық салоны өз қызметін бастады. Мәселен  Аманжолова Жамал Бақытбекқызы  халықтың әлеуметтік осал топтарына арналған сауықтыру орталығын іске қосты. Жоба шеңберінде алты ай ішінде 30-ға жуық көмек пен қолдауға мұқтаж жандар өз денсаулығын жақсарту мақсатында сауықтыру орталығының қызметіне жүгінген. Тұрғындарды сауықтыру-шынықтыру үшін спорттық құрал-жабдықтармен жасақталған арнайы бөлмеде педиатр, терапевт  мамандар кеңесін алуға да мүмкіндік жасалған. Жастарды жұмыспен қамту, жұмыссыз және жеке кәсібін жемісті жүргізіп жүрген жастарға жәрдемдесу мақсатында жергілікті атқарушы органдар тарапынан жоспарға сәйкес жүйелі іс-шаралар атқарылуда. Статистикалық деректерге сүйенсек, биыл «Жұмыспен қамту және жаппай кәсіпкерлікті дамытудың 2017-2021 жж. арналған» бағдарламасы аясында 7881 жас жұмысқа орналастырылған.  Жастар кәсіпкерлігіне қолдау көрсету мақсатында биыл шілде айынан бастап «Атамекен» Ұлттық кәсіпкерлер палатасы Маңғыстау облыстық филиалы жанынан «Жас кәсіпкер» жобасы жүзеге асырылды. 492 жас кәсіпкерлік негіздері бойынша жүйелі білім алып,  арнайы сертификаттарға қол жеткізді. Жаңа бизнес-идеяларды іске асыру үшін 141 адам 71 205 мың теңге мөлшерінде дейін (200 АЕК) мемлекеттік гранттар алды. Оқыту барысында ай сайын 19 мың теңге стипендия берілді. Бизнес жобаларын қорғап шыққандар 505 мың теңгелік грантты жеңіп алу және үкімет тарапынан 4-6% жеңілдікпен несие алу мүмкіндігіне ие болды.

Голрох ЖЕМЕНЕЙ