Аймақта «Ардагерлер туралы» заң тұжырымдамасы талқыланды

Бүгін Маңғыстауда «Ардагерлер туралы» ҚР-ның заң жобасы талқыланды. Заң жобасын ардагерлер ұйымдарының өкілдеріне облыстық еңбек және әлеуметтік бағдарламаларды үйлестіру басқармасы басшысының орынбасары Қарашаш Нұрмамедова таныстырды, - деп хабарлайды mangystaumedia.kz сайты. «Заң аясында басқа елдердегі ұрыс қимылдарға қатысқан әскери қызметшілерді, интернационалист-жауынгерлерді, Чернобыльға қатысушыларын, сондай-ақ Социалистік Еңбек Ерлерін әлеуметтік қолдау бойынша шараларды күшейту көзделген», - дейді ол. Айтуынша, басқа мемлекеттердің аумағындағы жауынгерлік іс-қимыл ардагерлері санатына Ауған жауынгерлерінен басқа 1992 жылдан 2001 жылға дейінгі кезеңде тәжік-ауған шекарасында ТМД-ның сыртқы шекарасын күзетуді күшейтуге, 1968 жылы Чехословакиядағы жанжалды реттеуге, Таулы Қарабахтағы этносаралық жанжалды реттеуге қатысқан адамдарды, сондай-ақ Ирактағы бітімгершілік операцияларына қатысқан ұлттық контингентті қосу жоспарланып отыр. «Жаңадан енгізілетін санат үшін 4,8 АЕК мөлшерінде арнайы мемлекеттік жәрдемақы белгіленді (2020 жылы – 12 725 теңге). Арнайы мемлекеттік жәрдемақыдан басқа, аталған адамдарға Ауғанстандағы ұрыс қимылдарына қатысқан әскери қызметшілер үшін, оның ішінде тұрғын үйге кезекке қою, салық салу, тегін медициналық қызмет көрсету, санаториялық-курорттық емдеумен қамтамасыз ету және т.б. бойынша қолданыстағы барлық құқықтар мен кепілдіктер берілетін болады», - деп жазылғанын айтты басқарма басшысының орынбасары Қ.Нұрмамедова. Десе де, ардагерлер қабылданғалы отырған заңға өз ұсыныс-пікірлерін білдірді. Тіпті басқа мемлекеттің аумағындағы жауынгерлік іс-қимыл ардагерлері санатына кейбір жауынгерлердің жоқ екендігін атап өтті. Сондай-ақ Семей полигонының ардагерлері ешқандай санатқа кірмегенін және мемлекет тарапынан жәрдемақы берілмейтіндігіне қынжылды. Шара аясында, ардагерлердің басым көпшілігі «Ардагерлер туралы» заңды қайта қабылдағанымен жағдайдың өзгеретініне сенімсіздік танытып отыр. Олардың басты талабы – тұрғын үйі жоқ соғысқа қатысқан азаматтарды үймен қамту, төленетін жәрдемақы көлемін арттыру, медициналық көмектің кезексіз берілуі. Ал Маңғыстау облыстық еңбек және әлеуметтік бағдарламаларды үйлестіру басқармасы басшысының орынбасары Қарашаш Нұрмамедова ардагерлердің талап-тілектерін тыңдап, министрлікке жеткізетінін айтты.

Жұлдызай ҚАЛИЕВА

Суреттер автордан