Жазасын өтегендер қоғамнан тыс қалмайды

Биылдан бастап «Рай» шұғыл әлеуметтік көмек көрсету орталығы Маңғыстау облыстық әлеуметтік бағдарламалар және жұмыспен қамту басқармасының тапсырысы аясында «Түзету мекемелерінен босап шыққандарға құқықтық көмек көрсету және әлеуметтік бейімдеу» жобасын жүзеге асырып келеді. -«Қақпа алдында кездесу» әлеуметтік жобасы соттал­ғандарды түрмеден босап шыққаннан кейінгі қо­ғамға бейімдеуге көмектеседі. Бүгінгі таңда бас бостандығынан айыру орындарынан шыққан адамдарды әлеуметтік бейімдеу, жұмысқа орналастыру және олардың әрі қарай азаматтық қоғамға сіңісіп кетуіне жағдай жасау маңызды мәселелердің бірі сана­лады. Себебі ондай азаматтар психологиялық тұрғыдан өте әлсіз келеді. Біз бұндай азаматтарға жұмыс орындарын ұсынып, тіркелу тәртібін де түсіндіреміз. Жазасын өтеп шыққан жандарға жеке құқықтары жөнінде мағлұмат береміз, – дейді «Рай» қоғамдық бірлестігінің ди­ректоры Райхан Бекманова. «Жуырда Мұнайлы ауданындағы пробация бөлімінен «Рай» әлеу­меттік көмек көрсету орталығына бір әйел адам келіп түсті. Азаматша Е.И. жазаны өтеуден шартты түрде мерзімінен бұрын босатылған. Жеке құжаттарсыз, жұмыссыз, жалдамалы пәтерде балалары мен науқас күйеуімен сергелдеңге түскен жанға қолдан келгенше көмек қолын созуға тырыстық. Азық-­түлік, киім­-кешекпен қамтып, құжаттарды қайта қалпына келтіру әрі жұмысқа орналастыру мақсатымен тиісті мекемелермен бірлесе іс­шараларды атқардық. Бұндай жұмыстар алдағы уақытта өз жалғасын табады», – дейді Р.Бекманова.

Голрох ЖЕМЕНЕЙ