Ақтаулық оқушы «Елбасы медалі» жобасының қола жүлдегері атанды

Ақтаудағы Назарбаев Зияткерлік мектебінің 12-сынып оқушысы Дариға Болатбай жастарды кешенді дамытуға арналған «Елбасы медалі» жобасының қола медалін иеленді, - деп хабарлайды mangystaumedia.kz сайты.

Ұлттық деңгейдегі жастарды қолдау бағдарламасының жүлдегері жеті бағыттан тұратын тапсырманы алты ай бойы орындаған.

18 наурыз күні Әбіш Кекілбаев атындағы тарихи-өлкетану музейінде жобаның Маңғыстау облысы бойынша жеңімпаздарын марапаттау салтанатты рәсімі өтті. Жеңімпаздарға медалді Маңғыстау облыстық білім беру басқармасының орынбасары Айжақсы Жылқыбайқызы табыс етті.

«Елбасы медалі жастарды ұлттық нақышта сыни ойлауға бағытталған ерекше жоба. Маңғыстау облысында жастардың жобаға қызығушылық танытып, белсенді қатысқандары қуантады. Еліміздің болашағына үлес қосар ұрпақты тәрбиелеуде жобаның берері мол. Сондықтан барша жүлдегерлерді құттықтаймын», - деді басқарма басшысының орынбасары Айжақсы Жылқыбайқызы.

Ал қола медаль иегері Дариға Болатбай жобадан дүниетанымы кеңейе түскенін және тұлғалық дамуына жобаның әсері көп болғанын айтады.

«Елбасы медалі жобасының негізінде мен волонтерлік қабілетімді дамытып, кіпат оқуға құштарлығымды арттырдым. Жоба аясында бос уақытымда Тұщықұдық ауылындағы көпбалалы отбасыда тәрбиеленіп жатқан балаларға ағылшын тілін үйреттім. Бұл пандемия кезінде маған көп көмегін тигізді. Сондықтан жоба ұйымдастырушыларына алғысым шексіз», - дейді ол.

Айта кетейік, «Елбасы медалі» - жастарды кешенді дамытуға бағытталған ұлттық деңгейдегі бағдарлама. Жобаға қатысу арқылы, жастар өз уақытын басқаруға, мақсат қоюға және оларға жүйелі түрде қол жеткізуге, салауатты өмір салтын ұстануға және үнемі өзін-өзі дамытуға үйренеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.