Маңғыстау жастар ресурстық орталығы "Mangystau Nauryz Fest - 2021" жастар фестивалінің "Игі істер күні" аясында №69 түзету мекемесінің кітапханасына 500-ге жуық кітап тарту етті, - деп хабарлайды mangystaumedia.kz сайты.
Бұл – бар-жоғы 2 айдың көлемінде жиналған кітап саны. Олардың ішінде Мұхтар Әуезовтың 4 томдық «Абай жолы» эпопеясының екі тілдегі нұсқасы, қазақ және әлем көркем әдебиеттері мен басқа да түрлі жанрдағы шығармалар бар.
«Жылдың басында осы түзету мекемесінде болып, түрменің тіршілігімен таныстық. Облыстық жастар ресурстық орталығы мен түзету мекемесі арасында меморандумға қол қойдық. Кездесу барысында сотталушылардың кітапханаға жаңа кітаптардың қажет екендігін жеткізген болатын. Сол өтінішке сәйкес бүгін мереке қарсаңында осы кітаптарды сыйға тарттық»,-дейді Маңғыстау облыстық жастар ресурстық орталығының директоры Абылай Фазылбек.
Бүгінде облыс орталығындағы №69 түзету мекемесінде 700-ге жуық жазасын өтеуші бар. Олардың заң жүзінде бас бостандығына шектеу болғанымен, рухани дамуына ешқандай кедергі жоқ.
Кітапхана меңгерушісі Нұрлан Дауытбаевтың айтуынша, сотталушылар арасында қазақ басылымдарына сұраныс көп дейді. Игі шара жаз айларында тағы жалғасын таппақ.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
