Аймақта 35 мыңнан астам отбасыға жаңа мемлекеттік жәрдемақы беріледі

Маңғыстау облысында 35 мыңнан аса көпбалалы отбасыға жаңа мемлекеттік жәрдемақы тағайындалады. Бұл туралы облыстық еңбек және әлеуметтік бағдарламаларды үйлестіру басқармасы басшысының орынбасары Қарашаш Нұрмамедова айтты, - деп хабарлайды mangystaumedia.kz сайты. 2020 жылдың 1 қаңтарынан бастап берілетін жаңа мемлекеттік жәрдемақы бірге тұратын 4 немесе одан көп кәмелетке толмаған және 23 жасқа дейінгі күндізгі бөлімде оқитын балалары бар отбасыға беріледі. Қазіргі таңда облыс бойынша 16 690 көпбалалы отбасы мемлекеттік жәрдемақыны алып отыр. Басқарма басшысының орынбасары Қарашаш Нұрмамедованың айтуынша, олар құжат жинамай-ақ жаңа мемлекеттік жәрдемақыны ала алады. «2018 жылдан кейін төртінші немесе бесінші баласы дүниеге келген, яғни бұрын жәрдемақы алмаған отбасылар ғана құжат дайындайды. Қазір облыста жәрдемақы алмаған 7391 отбасы бар. Оның 5 107-і өтініш беруі керек, ал қалған 2 284 көпбалалы отбасының балалары әртүрлі мекенжайда тіркелген екен. Мұндай жағдайда жаңа мемлекеттік жәрдемақы берілмейді. Сондықтан да балаларды тұрақты мекенжайға тіркеп, арнайы құжаттарды әзірлеу керек. Өтініш қабылдаудың мерзімінде шек жоқ», - дейді Қ.Нұрмамедова. Айтуынша, 4 баласы бар отбасыға 42 496 теңге беріледі, 5 балаға – 53 127 теңге, 6 балаға – 63 757 теңге, 7 және одан да көп балаға 74 388 теңге тағайындалады деп жоспарланған. Сондай-ақ табысы аз отбасылардан шыққан балалар үшін кепілдендірілген әлеуметтік пакетті енгізу ұсынылып отыр. «Енді 1 жастан 6 жасқа дейінгі балаларды азық-түлік жиынтығымен және гигиеналық құралдармен қамтамасыз етіледі. Ал 6 жастан 18 жасқа дейінгі балаларға мектепте ыстық тамақ, оқу құралдар және мектеп киімі беріліп, олардың мектепке дейінгі жол жүру шығындары өтеледі. Стоматологиялық көмек 18 жасқа дейінгі балаларға тегін  медициналық көмектің кепілдік берілген көлемі және міндетті әлеуметтік медициналық сақтандыру шеңберінде көрсетіледі», - деді Маңғыстау облыстық еңбек және әлеуметтік бағдарламаларды үйлестіру басқармасы басшысының орынбасары Қарашаш Нұрмамедова.

Жұлдызай ҚАЛИЕВА

Сурет автордан