Cенекте жаңа балабақша ашылды

Қарақия ауданының Сенек ауылында «Ясин» атты жаңа балабақша ашылды. Салтанатты шараға Қарақия ауданының әкімі Қыдырберді Беков, орынбасары Бауыржан Тұяқов, аудандық мәслихат хатшысы А.Мееров, «Сенек» ЖШС директоры Қ.Наурызмағанбетов және ауыл әкімі мен тұрғындары, аудандық білім бөлімінің қызметкерлері қатысты. Ауыл тұрғындарын жа­ғымды жаңалығымен құттықтаған аудан бас­шысы балабақшаны ашқан кәсіпкер Фазыл Сырымұлына алғысын айтып, ұжым қызмет­керлеріне сәттілік тіледі. Бұдан соң ауыл тұрғын­дары атынан кәсіпкер­дің анасы және Сенек ауылының алғашқы балабақшасының ардагері сөз алып, ата-аналарды құт­тықтады. Ауыл ардагер­лері лента қию рәсімін өткізіп, ақ жаулықты ана­лар шашу шашты. Аудан және ауыл басшылары балабақшаны аралап кө­ріп, ішкі жұмысымен та­нысты. Айта кетейік, бұл аудан көлемінде үшінші рет ашылып отырған же­кеменшік мектепке дейінгі мекеме. Сенек ауылы­нан жиырма адамды жұмыспен қамтып отырған жаңа ұжым екі топта 50-­ге жуық баланы қабылдайды. Бұдан басқа ауылда мемлекеттік не­гіздегі балабақша да бар. Негізінде бұл ауылда балабақша кезегінде тұрған бес бала бар болатын. Алайда қазірдің өзінде жаңа балабақшаға қырыққа жуық тәрбиеленуші келіп үлгерген. Жалпы ауылдарда адам санының өсуі байқалады.

Шынар КЕНДІН