Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасары Қуаныш Бүркітұлының бастамасымен Қарақияда алқалы жиын өтті.
Аудан әкімдігінің үлкен мәжіліс залында сыбайлас жемқорлыққа қарсы іс-қимылдың жай-күйімен танысу мақсатында өткен жиынға «Маңғыстау адалдық алаңы» жобалық кеңсе жетекшісі Дайрабай Үсіпбаев және ақпараттық-ағартушылық штабының жетекшісі Ағлен Таласбаева қатысты.
Жиынды алғы сөзбен ашқан аудан әкімі Қ.Беков арнайы келген топ өкілдеріне сөз берді.
Алғашқы сөз кезегін Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасары Қуаныш Мырзағали алды.
«Бүгінгі таңда сыбайлас жемқорлықпен күрес — ең өзекті мәселелердің бірі. Сондықтан елімізде сыбайлас жемқорлықпен күресу күштері жанданып, оның алдын алу бойынша түсіндіру шаралары жүргізіліп келеді. "Адалдық алаңы" жобасы аясында аудан орталығындағы "Сервистік әкімдік" кеңсесімен таныстық. Енді, "Сервистік әкімдік" кеңсесін ауданға қарасты Жетібай және Мұнайшы ауылдарында ашуды жоспарлап отырмыз», - деп жемқорлыққа қарсы мәдениетті қалыптастыру, құқықтық сауаттылықты арттыру мәселелерін тілге тиек етті.
Бұдан кейін жиынға онлайн форматта қатысқан ҚР Президенті жанындағы Мемлекеттік басқару академиясының Маңғыстау облысы филиалының директоры Демеуова Айгүл Амангелдіқызы сыбайлас жемқорлыққа қарсы күрес туралы заңнамалардың негізгі ережелерін баса айтты.
Сондай-ақ, «Маңғыстау адалдық алаңы» жобалық кеңсе жетекшісі Дайрабай Мамашұлымен ақпараттық-ағартушылық штабының жетекшісі Ағлен Таласбайқызы аудан әкімдігі тарапынан сыбайлас жемқорлыққа қарсы құқық бұзушылықтардың алдын алу аясында атқарылып жатқан бірқатар жүйелі жұмыстарды атап өтті.
Айта кетелік, Қарақия ауданы бойынша ақпараттық-ағартушылық штабының жетекшісі болып, № 6 жалпы орта мектеп директорының тәрбие жөніндегі орынбасары Дәметкен Аманқосқызы сайланды.
Сыбайлас жемқорлық қатерлерінің алдын-алу және жол бермеу мәселелерін талқыға салған жиында аудан әкімі Қыдырберді Әндірұлы жыл басынан бері атқарылып жатқан жұмыстарға тоқталып, жемқорлықсыз ел болуға шақырды.
Фариза Хайдарова
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
