Жаңаөзенде апатты жағдайдағы 3 үй жөнделіп жатыр

Жаңаөзен қаласындағы 1 шағын ауданда орналасқан 19 үй осыдан 52 жыл бұрын салынған. Биыл қала әкімдігі апатты жағдайдағы 3 үйді қолға алып түгелдей жаңартуға кірісті. Бұл туралы mangystaumedia.kz сайты Маңғыстау облысы әкімінің баспасөз қызметіне сілтеме жасап хабарлайды.

Үйдің қазір жертөлесі тазаланып, ондағы жылу, ауыз су және тоқ желілері ауыстырылды. Сыртқы қасбеті сырланып, баспалдақтары бекітілді. Сондай-ақ ғимараттың шатыры қайта жаңартылды.

«Жаңаөзенде барлығы 262 көпқабатты тұрғын үй бар. Оның 52-сі күрделі жөндеуді қажет етеді. 2019 жылы тозығы жеткен үйлерді қайта жаңғырту жұмыстары үшін Жаңаөзенге республикалық қордан 252 млн теңге аударылады. 183 млн теңгесі осы 3 көпқабатты баспананы толық жаңалауға жұмсалып жатыр», - дейді Жаңаөзен қалалық тұрғын үй инспекциясы бөлімінің басшысы Сүйіндік Мұхамедов.

Осы жұмыстар арқылы көп пәтерлі тұрғын үйлердің қызмет ету мерзімін ұзартуға болады. Күрделі жөндеу жүргізіліп жатқан тұрғын үйлер қолданыстағы тұрғын үй заңнамасына сәйкес басқарудың жаңа форматына көшеді. Яғни, тұрғын үй кооперативінен (КСК) мүлік иелерінің бірлестігі (ОСИ) нысанында басқарылатын болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.