Ислам дінінің қадірін кетіріп, бабамыз ұстанып келе жатқан асыл дінімізге күйе жағып, оны өзгертуге тырысқандар ойлап шығарған ағымдардан зардап шегіп жатқан елдер аз емес. Өскелең ұрпақты жат ағымдардан қорғап қалу үшін оның алдын алудың тиімді екендігі анық. Осы мақсатта қолға алынып жатқан шаралар да аз емес.
Соңғы жылдары балалар мен жастарды жат ағымдар құрығынан сақтап қалу үшін оның алдын алу бағытында Түпқараған аудандық ішкі саясат жəне тілдерді дамыту бөлімінің «Деструктивті діни ағымға қарсы имунитет қалыптастыру үшін» әлеуметтік тапсырысы аясында жұмыс қыруар шаруалар тындырып келе жатқан Ауған соғысы ардагерлерінің Ақтау қалалық «Бауырлас жауынгерлер» қоғамдық бірлестігі жақында тағы бірқатар шаралар өткізді.
Бұл жолы Түпқараған ауданының Ақшұқыр ауылында «Діни экстремизмнің алдын алайық» тақырыбында өткен акция барысында жоғарғы сынып оқушыларына деструктивті діни ұйымдардың құрығына түсуден сақтандыратын нұсқама брошюралар мен флаерлер «Өзің оқы да, келесіге жалғастыр» деген ұранмен таратылды.
Басқосуда Мұнайлы аудандық «Ар-Рахман» мешітінің найб имамы, исламтанушы теолог Есбол Бегалыұлы сөз алып, қызықты да тартымды әңгіме айтты.
Ол дінге қызығушылық туындаса, діни кітаптар оқығыңыз келсе, кез-кеген кітаптарды оқымай, Қазақстан мұсылмандары діни басқармасының рұхсатымен шыққан кітаптарды, яғни ішінде арнайы мөрі бар кітаптарды ғана оқуға болатынын және қандай сайттарға кіруге, қандай уағызшыларды тыңдауға болтынын егжей-тегжейлі түсіндірді.
Ауған соғысы ардагерлерінің Ақтау қалалық «Бауырлас жауынгерлер» қоғамдық бірлестігінің ҚБ төрағасы Мәтжан Шаулиев жастар арасында теріс ағымдарға қарсы шаралар жүргізудің күн тәртібінен түспейтін өзекті мәселе екендігін атап өтті және дәстүрлі дініміз Исламмен сабақтасқан әдет-ғұрпымыз туралы түсінік беріп, жат діни ағымдардың кейбір айырмашылықтары туралы айтты. Сондай-ақ Матжан Рамазанұлы Ислам атын жамылған теріс ағымдардан сақ болу керектігін ескерті.
Жиналысқа қатысқан оқушылар исламтанушы теологқа намаз оқуға және жалпы дінге қатысты сұрақтарын қойып, тұшымды жауаптар алды. Осынау қызықты акция Сайын Шапағатов ауылының мектеп лицейінде жалғасып, мектеп оқушылары дінімізге қатысты біраз мәселелерге қанықты. Мұнда да қоғам өміріне еніп бара жатқан теріс ағымдар жайында түсінік беріп жат діни ағымдардан сақ болу туралы айтылып, брошюралар мен флайрлар таратылды.
Валентина ҚОЗЫБАҚОВА Суреттерді түсірген Талант ҚҰСАЙЫН
[gallery td_select_gallery_slide="slide" ids="67359,67360,67361,67362,67363"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
