Мемлекеттік қызметтің сапасы артуда

Киелі Маңғыстау өңірі мен Атырау облысы арасындағы байланысты нығайту, Елбасы Н.Ә.Назарбаевтың «100 нақты қадам» жобасының аясында жемқорлыққа қарсы күресу және мемлекеттік қызметкерлердің сапасын арттыру мақсатында Нұрлан Ноғаев бастаған Атырау облысының делегациясы іссапармен Маңғыстау облысына келді.

Аталған жұмыстардың қаншалықты деңгейде жасалып жатқанын талқылау үшін көрші қос облыстың әкімдерінің қатысуымен жиын өткен болатын. Жиын бары­сында сөз бастаған Маңғыстау облысының әкімі Ералы Тоғжанов келелі кеңестің көптеген игі жақтары барын айта отырып, өңірімізге келген қонақтарға ризашылығын білдірді. Өз кезегінде Атырау облысының әкімі Нұрлан Ноғаев келе­шекте бірлесіп атқарар жұмыстардың маңызды­лығына тоқталып, жүздесудің нәтижесі оңынан боларына сенім білдірді.

Маңғыстау облысында Елбасының нұсқа­уымен тапсырылған жұмыстардың қаншалық­ты деңгейде атқарылу, нәтижесін баяндау мақ­сатында тізгін алған Маңғыстау облысы әкімі аппараты басшысының орынбасары Әсел Болма­нова өз кезегінде:

- Мемлекеттік қызметкерлердің сапасын арттырып, жалақы­сын жетілдіру Елбасымыздың жыл басынан бері бағдар берген жобасының маңызды тұсы. 2018 жылдың қаңтарынан бастап облысымыздағы жергілікті атқарушы органдарда қызмет ететін 1285 лауазымды қызметкердің 84-­іне қысқарту жүргіздік. Себебі лауазым иелерінің орны әртүрлі бол­ғанымен, бір бағыттағы ғана жұмыстарды орындайтын қызметкерлердің болуында. Со нымен қатар атқарылар жұмысты тиімді орын­дау үшін мемлекеттік қызметкерлерді лауа­зымына қарай 3 топқа жіктедік, олар – негізгі (басқарушы), жәрдемдесуші (орындаушы), қосалқы (шаруашылық) бөлімдерден тұра­ды, – деп мәлімдеді.

Биыл ең ескерер жайт – мемлекеттік қыз­меткерлердің жалақасының артуы. Бұдан былай жаңадан орныққан жас мемлекеттік қызметкерлер 190 мың көлемінде жалақы алады, ал қызметте жылдап жүріп еңбек ет­кен қызметкердің жалақысы еңбек өтіліне байланысты өсіп тұрады. Орындалған осы жұмыстардың арқасында мемлекеттік қыз­меткерлер арасында жемқорлық жойылып, қызмет сапасы 2 есеге артады деп күтілуде.

Алқалы жиынның соңына қарай азамат­тар өздерін мазалаған сұрақтар бойынша қос облыс әкіміне сауал тастап, қажетті ақпараттарына көздері жетті.

Мадияр ТӨЛЕУОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.