©
Түпқараған ауданының әкімі Асауов Темірбек алдын-ала бекітілген кестеге сәйкес Ақшұқыр, Сайын Шапағатов ауылына арнайы барып 2017 жылдың қорытындысы бойынша есеп берді. Есеп барысында ауданның әлеуметтік-экономикалық көрсеткіштері мен әр салада атқарылған жұмыстарды баяндады. Аудан әкімі жергілікті тұрғындардың сұрақтарына жауап беріп, ұсыныстарын тыңдады.
Аудан әкімімен қатар қала және ауыл әкімдерінің жергілікті халық алдында есеп беру науқаны басталды. Ақшұқыр мен Сайын Шапағатов ауылының тұрғындары алдында Түпқараған ауданы әкімімен бірге аталған екі ауылдың басшылары А.Нұғманов пен Ғ.Нұржаубай да тұрғындарға есеп берді. Олар ауылдастарына жыл бойы атқарылған жұмыстар мен алдағы жоспарларын таныстырды. Кездесуге аудан әкімінің орынбасарлары, аудандық мәслихаттың хатшысы, депутаттары, барлық сала бойынша бөлім, мекеме басшылары және Маңғыстау облыстық энергетика және тұрғын үй-коммуналдық шаруашылық басқармасы басшысының орынбасары О.Еңсегенов, ҮЕҰ өкілдері қатысты.
Қазіргі таңда Түпқараған ауданында 29 мыңнан астам тұрғын бар. Өткен жылы ауданда әлеуметтік-экономикалық даму қарқынды жүргізілген.
— Ауданның әлеуметтік-экономикалық дамуын сипаттайтын макроэкономикалық көрсеткіштер /11 аймен/ тұрақты өсу динамикасын көрсетеді. Өнеркәсіп өнімдерінің ауқымы 464,6 млрд. теңге /өсім 17,1%/, өнеркәсіп өнімдерінің ауқымының индексі- 98,5% /өсім 3,4%/. Ауыл шаруашылық өнімдерінің жалпы шығарылымы - 1492,9 млн. теңге, нақты көлем индексі - 108,3%. Негізгі капиталға салынған инвестиция көлемі 35,8 млрд. теңге, қолданысқа енгізілген тұрғын үй жалпы алаңының көлемі - 44,2 мың шаршы метр, құрылыс жұмыстарының көлемі - 11,0 млрд. теңге болды. Орташа еңбекақы көлемі - 181306,0 теңге /өсім 9,8%/ құрады, — деді аудан әкімі Темірбек Асауов кездесу барысында.
Кездесуде тұрғындар көкейлеріндегі сұрақтарын қойды. Сауалдардың көбісі, жауын жауса балшыққа айналатын ауылішілік жолдар, жалпы ауылішілік жолдардың жайы мен қаңғыбас, иесіз иттердің мәселесі, көше тазалығы мен электр энергиясы тарифінің өсуіне қатысты болды. Аудан орталығынан шалғай орналасқан ауыл тұрғындарының ХҚКО мен Халық банкінің, Қазақтелеком байланыс қызметінің интернет жылдамдығы өте төмен екендігін айтып, Қазпошта бөлімшелерінің қызметіне көңілі толмаушылықтарын жеткізді. Аудан мен ауыл басшыларының есебіне жақсы деген баға берді.
Кездесу соңында аудан басшысы ауыл әкімдерін алдағы уақытта да жоспарлы жұмыстарды жүйелі жалғастырып, Елбасы жүктеген міндеттерді бірлесе жүзеге асыруға шақырды.
Жадыра ЖОЛДАСОВА
Тағы оқыңыз: Бейнеудегі алты ауыл: бүгіні мен болашағы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
