Кадет корпусында оқып жүрген бейнеулік жас оқушыларды әскери оқу орнына шақырды

©

Ш. Уәлиханов атындағы Қорғаныс министрлігінің кадет корпусы бастапқы әскери білім бағдарламасы бойынша Қазақстан Республикасының Қарулы Күштерінің сержанттық лауазымында қызмет атқаратын кіші командалық құрамды даярлауды жүзеге асырады. Осы әскери оқу орнында біздің де жерлесіміз білім алуда.

Осыдан алты ай бұрын, туған ауылынан алысқа ұзап көрмеген, бұғанасы қатпаған балғындай жасөспірім арман қуып, Ақмола облысы Щучинск қаласындағы Ш.Уәлиханов атындағы Қорғаныс министрлігінің кадет корпусының табалдырығын аттаған болатын. Ол – Бейнеу ауылындағы Манашы орта мектебінің түлегі, ауылымыздың азаматы Жандарбек Байрамбайұлы Убайдуллаев.

Бүгінде еліміздің еңселі әскери оқу орнында білім алып жүрген азаматтың, балалық шағының артта қалып, әскери тәрбиеге шыңдалып, ер жеткені байқалып­-ақ тұр. Қысқы оқу демалысына келген кадет Жандарбек болашақтарын енді ғана көз алдарына елестетіп жүрген ауыл жастарының алдында еңселі жігіт, үлкен аға болып көрінгені сөзсіз.

Өзінің түлеп ұшқан алтын ұясы – Манашы орта мектебінің соңғы сынып оқушыларымен кездесіп, өзі оқитын әскери оқу орны тура­лы, оның қиыншылығы мен қызықтарын, Жандарбек Байрамбайұлы оқу орнын аяқтағаннан кейін алатын «Отан қорғаушы» мамандығының бағыттарын және болашағы мол екендігін әңгімелеп берді.

Ол жерде 17 жасқа жаңа толған жасөспірімдер жаңа үлгіде, тиянақты әскери киім киген кадетті көргенде қызығушылықтарын жасыра алмады. Болашақ кәсіби сержант ағаларын әскери оқу орны туралы сұрақтардың астына алды. Жасөспірімдердің қызығушылығын көрген кадет өзінің әскери оқу орнына барған күнінен бастап бүгінгі күнге дейінгі әскери өмірде көрген­ білгендерін, ол жақтан алған әскери тәрбиесінің мол екендігін алға тартып, болашақта азаматтарға «Отан қорғаушы» мамандығын таңдауға ақыл­-кеңесін берді.

Айта кетейік, кадет корпусына 17-­21 жас аралығындағы жастар оқуға қабылданады.

Жалпы оқу бағдарламасы 1 жыл 10 айға есептелген. Бірінші курста кадеттер әскери қызметтің негіздерін үйреніп, әскери ант қабылдайды және 10 жылға келісім­-шартқа қол қояды. Екінші кур­стан бастап жауынгерлік тағлымдамадан өтеді. Олар Қазақстан Республикасы Қарулы Күштерінің әскери бөлімдеріне барып, теориялық білімдерін іс жүзінде сынайды.

Оқу бітірісімен кадеттер «Әскери басқару» мамандығы бойын­ша «Әскери басқарудың кіші маманы (менеджер)» біліктілігі беріл­гені туралы диплом алады.

Сонымен қатар 3 сыныпты БМП жүргізушісі және «В», «С» кате­гориялы автокөлік жүргізушісі куәліктері беріледі.

Осы орайда болашақта «Отан қорғаушы» мамандығын таңдап, әскери оқу орындарында оқуға ниет білдіріп оқимын деген аза­маттар болса, оларға жол ашық екенін айта отырып, Қазақстан Республикасының басқа да әскери оқу орындары туралы бірер мәлімет бере кетейік:

Құрлық әскерлерінің әскери институты, Алматы қаласы, 4 жыл. Радиоэлектроника және байланыс әскери­инженерлік институ­ты, Алматы қаласы, 5 жыл.

Әуе қорғаныс күштерінің әскери институты, Ақтөбе қаласы, 4 жыл.

«Жас Ұлан» әскери мектебі, Астана қаласы, 9 сыныптан кейін. Әскери оқу орындарында оқимын деген жастарға оқу орын­дар туралы аудандық қорғаныс істер жөніндегі бөлімнен толық мағлұмат ала алатындарын жеткізе отырып, қиындығы мен қызығы бірдей жүретін әскери қызметтегілер мен оқудағы аза­маттарымызға аянбай еткен еңбектері мен төккен тердің жемісін жеуге тілектестік білдіреміз.

Ж.ТАЙШЫБАЕВ, Бейнеу ауданының қорғаныс істері жөніндегі бөлімінің келісім-шарт бойынша әскери қызметшілерді қабылдау, әскерге шақыру және әскерден тыс даярлық бөлімшесі бастығының көмекшісі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.