Ұйғыр қызы – РӘБИЯМ

©

Түпқараған ауданының мәдениет саласында ұзақ жылдар басшылық қызметте жасаған, мәдениет саласының ардагері Рая Юлдашқызымен «Лекториум-2018» жобасы бойынша еркін форматта кездесу өтті.

Түпқараған жастарының ресурстық орталығы ұйымдастыруымен өткен кездесуге кездесу қонағымен қыз­метте, өмірде бірге жүрген жолдастары мен сол жылдарда аудан әкімінің орынбасары қызметін атқарған, бү­гінде мәслихат депутаты Айкүміс Досанова және аудан жастары қатысты. Форт-­Шевченко мектеп-­интернатының акт залында жастармен өткен кез­десудің ерекшелігі – бұл жолғы кездесу кейіпкеріне ән арналған екен. Сөзі мен сазын жазған Айкүміс Досанова үзеңгілес досы, жолдасы Рая Жолды­ баеваға өз орындауында «Ұйғыр қызы Рәбиям» атты әнін арнапты. Сонымен қатар Рая Жолдыбаевамен өмірде, қызметте серік, дос, жолдас бола білген азаматтар мен елімізге танымал эстрада жұлдызы, Рая Жолдыбаева тәрбиесін көрген Кәмшат Жолдыбаева бейнежазба арқылы естеліктер жолдап, кездесудің әсерін арттырды. Қа­ тысушы жастар тарапынан мәдениетке келуі, қолөнері жөнінде сұрақтар жолданды.

Бүгінде Астанадағы немерелерін баптап жүрген әже – 11 немере, 4 жиенге асыл әже. Балаларын қанаттан­дырып, жалғыз қызы Жанарын құтты орнына қондырған Рая Жолдыбае­ваның азан шақырып қойған аты Рәбиям. Студенттік жылдарда құжатқа Фабиян болып тіркелген Рая апайды бүтін Ақкетік Рая ретінде жақсы таниды. Киномеханика мамандығымен Форт­-Шевченкоға жолдама алған талдырмаш қыз қаладан гөрі ауылға ұқсас бұл аймақтан болашақ жарын кездестірем деп мүлдем ойламаған. «Тағ­дырдың жазуы бұйырады» демекші, Жолдыбаев Нұрберген әулетінің үлкен ұлы Аманқос Жолдыбаевпен тағдыр дәм­тұзын жарастырады. Өнерлі әрі қонағы үзілмес үлкен әулеттің түндігін ашып, дастарханын жайып, ұрпағын тәрбиелеуден бөлек Рая Жолдыбаева да қаладағы «Заря» кинотеатрындағы киномеханик мамандығының жүгі тұр­ды.  Тоқсаныншы  жылдардың тоқырауында кинотеатр Рая апай сынды еңбекқор жандар арқасында Тәуелсіз­дік жылдарының бастапқы 15 жылына дейін есігін бір жаппады. Ауданда ғана емес, елдегі тоқыраудан тосылып қалған бұл саланың сылтуынан ауыл киноклубтары жәй ғана концерт қоя­тын зал ретінде пайдаланылды. Сол тұстарда лентамен кино қоймаса да, залды пайдалана бейнетаспалар ар­қылы кинолар көрермен назарына ұсынылып жүрді. Кешкі уақытта жастар үшін би кештерін ұйымдастыру да осы жанның тынымсыз тірлігі еді. Бәрін де бір арнада тоғыстырып, қатар алып жүре білген Рая кейін кинотеатр келмеске кеткен уақытта мәдениет саласына ойысты. Кино мен мәдениет ұқсас өнер. Рәбиям апаға мәдениеттің қызығы мен шыжығы көп қиындық­ тарын алып жүру қиынға соқпады. Бір- ге қызметте болған жандар да «Терісі кең, мінезге бай адам»­деп, бірден кісіге қарсы келмейтін жайсаңдығы мен адалдығын, қарапайымдылығын сөз етеді. Ол өзінің қызметтегі жылдарын «20 жыл мәдениет саласындағы еңбек өтілім ең бақытты кездерім»­ деп, еске алады. Рая апайдың қолымен дайындалатын тәтті тағамдары тіл үйіреді. Оның дайындайтын лағманынан бө­лек, «Өкпе құю» деп аталатын жаңа со­йылған қой өкпесіне пышақ тигізбей, оған қамырлы су құйып, дайындайтын тағамын ауылдастары аузынан тастамайды. Сол тағамның дайындалуы мен Рая апайдың өмір жолы, қызметі жайында сөз алған Айкүміс Сәрсен­ғалиқызы «Егер Раяға не сыйлар едің десе, мен ұйғыр қызы, қазақ келіні Рая замандасыма Отан сыйлар едім» деген әдемі тілегін жеткізді. Шынында қа­зақтың өнерлі шаңырағында өнегелі келін атану өзге ұлт түгілі өз қазағымыздан шыққан қыздарға бұйыра бермейтін бақ. Сол дәрежені өз биігінде ұстап, өзінің жайынан өзгенің жайына көп алаңдайтын мұндай көпшіл жан- дармен қоғам өзінің қамқорлық пен адалдық, адами құндылық деген түсі­ніктерін дәлелдейтіндей. Үлкенді де, жасты да жанына үйірте білетін жанның қайда да тауы шағылмайды. Бүгінде Рая апайдың тілеуін тілер жан көп. Ұмытпасам, 2012 жыл болуы керек, «Егемен Қазақстан» елдің бас газетіне поэзия падишасы Фариза Оң­ғарсынованың Ақкетікке келген 2011 жылғы соңғы сапарынан кейін көлемді мақала жарық көрді. Сол мақалада Ақкетіктің Айкүмісі туралы айтылады. Елге ер кісідей, бір кісідей қызмет етіп жүрген Айкүміс Досанова туралы мақалада Рая апаның да аты аталады. Онда қазаққа келін болған ұйғыр қызының ісмерлігі, шеберлігі мен елге еткен еңбегі де сөз болатын жері бар. Текті тұлғаның тегін емес мақаласына түрткі болу да кез келген жанға бұйыр­масы анық. Ақкетікке тағдыры айдап келіп, Ақкетік тарихында ізі қалар Рая апайдай адал адамдардың еңбегі жастарға үлгі болуы керек. Ол үлгіні де үлгі етіп жүрген жастар бүгінде «Лекториум» жобасы аясында еңбекпен өткен өмірді дәріптеп үлгеріп жатыр.

Милана ЕЛЕУСІНОВА

Тағы оқыңыз: Жас спортшылар чемпиондармен кездесті

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.