Ақын Айнахан Есетованың «Құсни ғұмыр» шығармашылық кеші өтті

©

«Бейнеу лицейі» коммуналдық мемлекеттік мекемесі ұжымының ұйымдастыруымен белгілі  қаламгер, журналист, ақын, шежіреші Айнахан Есетованың 60 жас мерейтойына арналған «Құсни ғұмыр» атты шығармашылық кеші өткізілді.

Айнахан Ығылманқызы -  отыз бес жылға жуық Маңғыстау өлкесінде журналистік қызметті абыройлы атқарумен қатар, қоғамдық жұмыстарға белсене ат салысқан, өлкенің өткен ғасырлардағы тарихына, шежіресіне, тарихи тұлғаларына қатысты тың деректерді зерттеп, тауып, тарихи тақырыпта оқырмандар сүйіп оқитын шығармалар жазған.Алғаш еңбек жолын Маңғыстау ауданынан «Жаңа өмір» газетінде журналистік қызмет бастап, аудандық, «Рауан» газетінде бөлім меңгерушісі, жауапты хатшы, редактордың орынбасары, «Үш қиян» республикалық ұлттық тәуелсіз газетінде, «Бейнеу ақшамы» газетінде редактордың орынбасары  болып жұмыс жасаған. Қазіргі таңда «Маңғыстау» облыстық газетінің Бейнеу ауданындағы қызметкері. Облыстық, республикалық жыр мүшәйраларының жүлдегері, «Маңғыстау жұлдыздары» фестивалінің екі дүркін жеңімпазы, «Отпантау» республикалық жыр додасының, «Қанатты әйел-2» идеялары мен тауарлары республикалық конкурсының жүлдегері. Ақынның «Өмір жолы», «Олжашы шежіресі», «Ақжелең» кітаптары оқырман қауымға жақсы таныс. Маңғыстау облысының қырық жылдығына арналған ақын-жазушылардың антологиясына, Қазақ ақындарының «Жыр-маржандары» томына, бірнеше жинақтарға өлеңдері мен прозалық шығармалары енген.

Ақынның Дара жолын таныту бағытында өткізілген рухани кешті мектеп директорының тәрбие ісі жөніндегі орынбасары Гүлназ Әжібаева жүргізіп, Бейнеу лицейіндегі «Риторика» мәнерлеп оқу үйірмесінің оқушылары ақын өлеңдерінен үзінді оқып, таланттың өзіне тән дара жолы туралы жайлы дайындалған бейне  көрсетілім назарға ұсынылды. Кеште ақынның өнердегі ізбасары, артынан ерген шәкірті  ақын Асылбек Жаңбырбай, туған бауыры Жакенай Ығылманқызы, аудандық іскер әйелдер қауымдастығыңың төрайымы, «Жарық» қосымша білім беру орталығының директоры Айжан Ағниязова, «Рауан» газетіндегі ұжымдасы Беркімбай Гарабаев құттықтау лебіздерін білдіріп, үлгі етерлік қырлары мен өмір жолдары жайлы айтты. Ұстаз ақын Ақмарал Талпақова мен  шәкірт ақын Әлішер Қабидолла Айнахан апайға арнап өздері шығарған өлеңдерін оқыды. Лицейдің ән-саз жетекшісі Рысты Кабулова ақынның сөзіне жазылған «Ақ келін» әнін шырқап, жырдан шуақ шашты.

Рухани кештің соңында Бейнеу лицейінің директоры Сағатбек Жұбанов сөз сөйлеп, Айнахан апайдың журналистік қызметтегі, ақындық және жазушылық өнердегі, отбасында ұлттық құндылықтарды сақтаушы,ұл-қыз тәрбиелеген ана ретіндегі өмір жолына тоқтала келіп, оның шығармашылық кешін ауданда  алғашқы болып, бастап беруді мақсат еткендерін айтты. Сондай-ақ ақынның өмір жолынан  дайындалған бейне көрсетілім лицейде апта бойы көрсетіліп тұратынын, ақынның құрметіне қоңырау сыңғырының орнына күй күмбірі беріліп тұратынын айтып, кітаптардың  ішіндегі ұлы кітап КҰРАН КӘРІМДІ  арнайы тақтасымен кеш иесіне тарту етті. Ақын апамыздың құшағы  гүлге толды, шығармашылық кешке қатысушылар рухани сусындады.

Өз кезегінде осындай игі шараны ұйымдастырған лицей ұжымына Айнахан апай алғысын айтып, ризашылығын білдіріп, өзінің жазған туындыларын, яғни екі жинақ кітабын мектеп кітапханасына  сыйға тартты.

Үміт ҚАЗДАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.