Жас ауданда жұмыс та, жоспар да көп

Өткен бейсенбіде Мұнайлы ауданының әкімі Нұрлан Тәжібаев халық алдында жылдық есебін қорытып, қол жеткен табыстармен қатар осы жылдың еншісіндегі жоспарлар мен міндеттерді нақтылап өтті. Есеп беру жиынына облыс әкімі Алик Айдарбаев, оның орынбасарлары, облыстық басқарма мен мекеме басшылары, ауыл әкімдері, аудан тұрғындары, үкіметтік емес ұйым мен БАҚ өкілдері қатысты.

Аудан әкімі Нұрлан Тәжібаев алдымен өткен жылы халыққа есеп беру кездесуінде тұрғындар тарапынан көтерілген мәселелер мен ұсыныс-пікірлердің орындалысы туралы баяндады.

– Осыдан 1 жыл бұрын тұрғындар Қызылтөбе-2 мен Жаңа Дәулет ауылдарын байланыстыратын жолға асфальт төсеу жөнінде ұсыныс айтқан болатын. Қазіргі таңда 7 шақырым 800 метр жолдың 3 шақырым 800 метріне асфальт бетон жабындысы төселді. Биыл бұл жұмыс жалғасады. Сонымен қатар Атамекен мен Басқұдық ауылдық округтерін қосатын жолды жөндеуге 91 млн.теңге бөлініп, жұмыстар аяқталды. Ұзындығы 15 шақырым Қызылтөбе-2 тұрғын үй массивінің ауылішілік жолының 3 шақырымына асфальт төсеу жұмыстары жүргізілді. Бұл жұмыстар кезең-кезеңімен жалғасады. Тұрғындар Атамекен ауылдық округінің 5 тұрғын массивінің ескі электр желісінің әлсіздігі мен қайта жөндеу, жарық шамдарын орнату жөнінде мәселе көтерген болатын. Осыған орай Атамекен ауылдық округінің Көктем, Шағала, Қаламқас, Туған ел және Атамекен тұрғын үй массивтерінің электр желісін қайта құрылымдау жұмыстарына облыстық бюджеттен 36 млн.400 мың теңге бөлініп, аталған жұмыстар толықтай аяқталды, – деді аудан әкімі Нұрлан Төлегенұлы.

Аудан әкімі баяндамасында өзекті мәселеге айналған Маңғыстау ауылынан аурухана құрылысын салу үшін жасақталған жобалық-сметалық құжатқа түзету енгізіліп жатқанын айтты. Сондай-ақ тұрғындар тарапынан жиі айтылатын 500 орындық аудандық мәдениет үйі мен кітапхана құрылысын жер қойнауын пайдаланушылар есебінен бастау жоспарланған. Аудан әкімі ауылға келген білім, денсаулық саласының жас мамандарын баспанамен қамту мақсатында 2017 жылы мамыр айында 100 орындық жатақхананың құрылысы басталатынын хабарлап, ағымдағы жылы жасалатын жұмыстардан хабардар етті.

Биыл Атамекен ауылдық округінде су жүйесі құрылысын жалғастыру, 2 спорт зал құрылысын бастауға қаржы қарастыру, «Асар-с» базарына дейінгі 3,6 шақырым автокөлік жолды және дренаж құрылысын бастау жұмыстары жүргізілмек. Аудан әкімінің баяндамасына жүгінсек, Баянды ауылындағы қатты тұрмыстық қалдықтарды көму полигоны жанынан қоқыс іріктейтін цех салу, Маңғыстау-3,4 тұрғын үй массивтерінде және Баянды ауылында 15 шақырым жолды жөндеу, Маңғыстау-1,2, Атамекен, Батыр ауылдық округтеріндегі және Баянды-3 елді мекеніндегі су жүйесінің құрылыс жұмыстары жүргізіледі.

Аудан әкімінің есепті баяндамасы тыңдалғаннан кейін сұрақ қоюға, ұсыныс- пікір айтуға кезек берілді.

– Елбасы Н.Назарбаевтың бастамасымен «Нұрлы көш» бағдарламасы бойынша бой көтерген Батыр ауылының халқы жылдан- жылға өсіп келеді. Мектеп ашылғанда 130 оқушы болса, қазір оқушы саны 1600-ге жетті. Халықтың демографиялық өсімі жоғары болғандықтан, келесі жылы 3000 оқушы мектепке барады деп жоспарлап отырмыз. Осыған байланысты Батыр ауылынан тағы жаңа мектеп салынса деген ұсынысым бар, – деді Батыр ауылының тұрғыны Күмісай Әбдіқадырова.

Бұл сауалға жауап берген аудан әкімі Нұрлан Тәжібаев Батыр ауылында 960 орындық мектеп құрылысын салу жоспарланғанын, жобалық-сметалық құжаттама жасақтауға ұсыныс берілетінін жеткізді. Құрылғанына 10 жыл болған Мұнайлы ауданның әлеуметтік- экономикалық жағдайы жақсарғанын айтқан Қыдырбай Жұпаров 30 мыңға жуық халқы бар Қызылтөбе ауылына су құбырын тарту мәселесі қашан шешілетінін сұрады. Аудан әкімі Нұрлан Тәжібаевтың айтуынша, Қызылтөбе ауылына ауыз су тартуға жобалық-сметалық құжаттама жасақталған. Өткен жылы жобаның қорытындысы алынғанын, ағымдағы жылы республикалық бюджетке ұсынылатынын хабарлады. Осы сәтте облыс әкімі Алик Айдарбаев 2020 жылға дейін ауданды сумен қамтуды 80 пайызға жеткізуді тапсырды. Басқұдық ауылдық округының тұрғындары атынан сауал жолдаған Бердібек Есенжанов Шығыс шағынауданының тұсынан келіп, Ақшұқыр жолына қосылатын жолайрықта орналасқан мейрамханадан түскен кезде Гранитке қарай 1,5 шақырым жолға асфальт төсеуді, Шығыстан келетін жолға бағдаршам орнатуды ұсыныс етті. Аудан әкімі Нұрлан Тәжібаев бұл жолды коммуналдық қызмет есебінен жөндеуге болатынын, сондай-ақ құбырларды тарту жұмыстары жүргізілгеннен кейін асфальт жол төселетінін жеткізді.

Облыс әкімі Алик Айдарбаев аудан әкімі Нұрлан Тәжібаев тапсырма мен міндеттерді толық орындағанын айтып, макроэкономикалық көрсеткіштерді қатаң бақылауда ұстауды, инвестициялық жобаларды сапалы және уақытылы жүргізуді, су, жол, тоқ және газбен қамту сияқты инфрақұрылымдық жаңа жобаларды дер кезінде және сапалы дайындауды назарға алуды,елді мекендердің санитарлық тазалығы мен абаттандыру жұмыстарын жүйелі жүргізуді, ауданда жұмыссыздық деңгейін төмендетуді тапсырды. Сондай-ақ республикалық бюджет есебінен биыл облыста 8 жаңа мектеп құрылысы басталатынын, Басқұдық пен Қызылтөбеде әрқайсысы 600 орындық мектеп салынатынын, Мұнайлы ауданындағы 3 ауылда ауылішілік жолдар жөнделетінін жеткізді. Сонымен қатар облыста елді мекендерді орталықтандырған ауызсумен қамту бойынша Атамекен, Батыр, Баянды ауылдарында су құбыры құрылысы аяқталатынын және Басқұдық, Маңғыстау-4 ауылдарын сумен қамту жұмыстары басталатынын хабарлады.

Фарида МҰҢАЛҚЫЗЫ Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.