Былтыр Маңғыстауға 200 мыңнан аса турист келген

Маңғыстау өңірі ҚР туристендіру картасының үздік ондығына енді. Бұл туралы аймақ басшысы Серікбай Трұмов мәлімдеді, - деп хабарлайды mangystaumedia.kz cайты.

Маңғыстау облысы елдегі туризмді дамытуға мүмкіндігі жоғары аймақ ретінде танылды. Облыс әкімінің айтуынша, «ҚР-ның туристік саласын дамытудың 2019-2025 жылдарға арналған» мемлекеттік бағдарламасына Каспий теңізінің жағалауында теңіз курортының инженерлік-коммуникациялық инфрақұрылымын дамыту бойынша іс-шаралар енгізілді.

«Жергілікті бюджет қаражаты есебінен Ақтау мен Құрық порты аралығындағы теңіз жағалауының инфрақұрылымын дамыту, оның ішінде электр қуатымен, сумен, газбен қамтылып жатыр. Сонымен қатар Ақтау қаласынан «Алау» балаларды сауықтыру лагеріне дейінгі 4 жолақты қозғалыстағы, одан әрі Құрық паромдық кешеніне дейінгі 2 жолақты қозғалыстағы автожолдың құрылысын салу және қайта құрылымдау бойынша қарқынды жұмыстар жүргізілуде», - деді халыққа есеп беру кездесуінде облыс әкімі Серікбай Трұмов.

Айта кетейік, былтыр Маңғыстау өңіріне келген турист саны 200 мыңнан асты. Оларға көрсетілген қызмет көлемі 4,1 млрд теңгені құрап, 104,3%-ға өскен.

Жұлдызай ҚАЛИЕВА

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.