Жағалауда жартастар да жаңғырып... (ФОТО)

Киелі Маңғыстаудағы Каспий теңізі жағалауының туристік әлеуетін арттыру үшін облыс аумағында ауқымды шаралар қолға алынған. Мәселен, Каспий жағалауында жартастарды жағалай 1,5 шақырым жерге жаяу жүргіншілер жолы салынуда.

Жартас бойындағы үңгірлер абаттандырылып, табиғи мұражайға айналады. Ал жұртшылықтың Каспийдің мөлдір суына шомылып, жұмсақ құмына аунауы үшін бірнеше шақырым жағажай абаттандырылып, осы жазда пайдалануға берілді. «Жағажай туризмін дамыту» жобасының нәтижесінде аймаққа келіп, демалушылардың саны биыл екі есеге өскен. Теңіз жағалауында құрылыс қызу жүруде. Он шақты техникамен жүзге жуық жұмысшы жартас жиегіндегі ойлы-қырлы жерлерді тегістеп, ретке келтіріп жатыр. Жаяу жүргіншілерге ыңғайлы болу үшін темірден мыңнан астам баспалдақ салынуда.

Жоба жетекшілерінің айтуынша, жаяу  жүргіншілердің қауіпсіздігі үшін сүрлеудің екі жағы қоршалып, әр 30 метр сайын бейнебақылау орнатылады. Сүрлеу жолдың бойында 24 шолу алаңы, балық аулайтын жерлер, суға түсу орындары мен шағын су көліктері тұрақтайтын аялдамалар салынбақ. Инвесторлардың қаржысына салынып жатқан жобаның алғашқы кезеңі алдағы айда қолданысқа беріледі деп жоспарланған. «Мұнда техниканы алып келу қиын болғандықтан, құрылыс жұмыстарының 90 пайызы қолмен жасалуда. Ағаш полимерлі композит материалын қолданамыз. Бұл – осы өңірдің табиғатына, ауа райына төзімді материал. 20 жылға дейін жарамды. Сүрлеу жолды салу кезінде жартастың табиғилығы сақталады», – дейді жоба авторы Марат Сюников.

ТАҒЫ ОҚЫҢЫЗ: Жағалаудағы жерді заңсыз басып алған жекежай иелері сотқа берілді

Сонымен қатар халықтың күндіз-түні демалуы үшін барлық жартас жарықтандырылады. Екі шақырым жерден көрінетін түрлі-түсті шамдар қойылып, түнгі қала ажарлана түспек. Жоба аясында жартастағы үңгірлерді де абаттандырып, табиғи мұражайға айналдыру көзделіп отыр. Мұндағы ең үлкен үңгірдің ұзындығы – 70, ені – 60 метр.

Теңіз жағалауындағы үңгірлер осыдан бір ай бұрын қоқысқа толы алаң болған. Қазір барлық жер тазартылып, қабырғасы құммен жуылды, табанына тақтатастар төселді. Алдағы уақытта отырғыштар қойылып, түрлі-түсті шамдар орнатылады. Қабырғада күні-түні Маңғыстаудың тарихы туралы деректі фильмдер көрсетілмек. Қазақ, орыс және ағылшын тілдерінде берілетін өлке тарихы саяхаттаушылардың қызығушылығын тудырары анық.

Қаланың солтүстігіндегі жағалау да  абаттандырылуда. Жоба бойынша дәл Каспийдің жағасында амфитеатр салынып жатыр. Биіктігі – 8, ені – 70 метр болатын дала сахнасында түрлі концерттер мен мерекелік кештер өткізілмек. Киіз үй, орындықтар қойылып, спорттық және ойын алаңдары салынады. Көне тарихтан сыр шертетін композициялар мен мүсіндер қойылады. Қазір құрылысқа 45 техника мен 450 адам жұмылдырылған. Құны 1 млрд.24 миллион теңге болатын жоба алдағы тамыз айында ел игілігіне беріледі.

«Жұмыс сәуір айында басталып кетті. Самал шағынауданынан төмен қарай түсетін баспалдақ болады. Ерекшелігі, мұнда сахна құрылысы пайда болады. Жаз басталғалы Ақтауға теңізге түсуге келетіндер саны артқан. Бір айдың ішінде 30 мың саяхаттаушы қарт Каспийдің жағасында демалыпты. Бұл өткен жылдың осы уақытымен салыстырғанда, екі есеге көп. «Бұл – жағажай туризмін дамытуға бағытталған ауқымды жұмыстардың жемісі», – дейді жергілікті билік. Теңізді жағалай 45 шақырымға инженерлік желілер тартылып, демалыс орындарына газ, су мен тоқ жетті. 2 шақырымдай жағажай абаттандырылып, халықтың тегін демалуына мүмкіндік жасалды», – дейді қалалық құрылыс бөлімінің басшысы Қайрат Ақыбаев.

Ноян ЖОЯМЕРГЕН Суреттерді түсірген Талант ҚҰСАЙЫН

[gallery td_select_gallery_slide="slide" ids="58030,58023,58027,58024,58025,58031,58026,58029,58032"]