Тәуелсіз Қазақстанның алғашқы үшемдері ЭКСПО-да волонтер болып жүр (ФОТО, ВИДЕО)

Тәуелсіз Қазақстанның алғашқы үшемдері, Нұрсұлтан Назарбаевтың өзі ат қойған Төле, Қазыбек және Әйтеке Тілегеновтер ЭКСПО-2017 көрмесінде волонтер болу үшін Куба аралынан арнайы ұшып келді.

[embed]https://youtu.be/Z7gLeQOZncg[/embed]

Үшемдердің әкесі Исраил Тілеген - дипломат және олар үш жасқа толғанда әкелерінің жұмыс бабымен Алматыдан Лондонға қоныс аударған. Лондонда 3 жыл тұрып, Астанаға, Астанада 6 жыл тұрып, Нью-Йоркке және Нью-Йоркте 5 жыл жүріп, Куба аралына көшкен үшемдер биыл Гавана қаласында мектепті аяқтады. «ЭКСПО-2017 көрмесі туралы өткен жылы естідік. Сол сәтте-ақ Лондон, Нью-Йорк, Гавана қалаларындағы достарымызды Астанаға шақыра бастадық, - дейді үшемдердің үлкені Төле.

- ЭКСПО көрмесін адамдар өмір бойы көрмеуі де мүмкін. Ал биылғы көрме өз Отанымызда өтіп жатыр, сондықтан ЭКСПО-ға міндетті түрде барамыз және волонтер болып, өз энергиямызды қосамыз деп шештік».

Балалар 12 жыл бойы ағылшын тілінде білім алған және ЭКСПО еріктілеріне қойылатын тіл білу талаптарынан сүрінбей өткен. Бала кезден жүзумен, футболмен айналысқан үшемдер медициналық тексеруден де сәтті өтіп, ЭКСПО-ның еріктілер командасына еш қиындықсыз қабылданған.

«Алғашқы күні үшеумізге бірдей униформа кигізді, күзетшілер аң-таң. Олар үш куәлікте бірдей фотосурет тұр деп ойлайды және міндетті түрде бас-аяғымызға дейін мұқият тексеріп шығады. ЭКСПО-ға келгелі фотоға түспеген күніміз жоқ. Келушілерге де, қызметкерлерге де біздің түріміз қызық және көп адамдар Төлені қазақстандық боксшы Данияр Елеусіновке ұқсатады», - деді Әйтеке. «Түріміз ұқсас болғанмен, мінезіміз әр түрлі. Мәселен, мені достарым көпшіл, жауапты деп сипаттайды, Қазбек - тұйық және салмақты, ал Әйтеке - үйдің кенжесі, өте көңілді және мұңаюды білмейді», - деп толықтырды Төле.

Қыркүйек айында үшемдер 19 жасқа толады. Олар биыл мектепті тәмамдап, Голландия мен Канаданың жоғары оқу орындарында түсіпті. Төле халықаралық бизнес, Қазыбек - заң және Әйтеке - Канаданың Монреаль қаласында компьютерлік бағдарлама бойынша білім алмақ. «Үлкен ағамыз Жанболат Америка Құрама Штаттарындағы оқуын аяқтады және қазір Астана қаласында жұмыс істеп жүр. Әрине, біз де қажетті білім жинақтаған соң, елге ораламыз. Біз де кейінгі тағдырымызды Астанамен байланыстырып отырмыз. Астананың күннен күнге көркейіп келе жатқаны бізді қуантады», - дейді Төле.

 Дереккөз: ҚазАқпарат ФОТО ҚазАқпарат және Әйтеке Тілегеннің парақшасынан /vk.com/instagram

[gallery td_select_gallery_slide="slide" ids="31152,31158,31151,31157,31156,31155,31154"]