Отызға жуық ер мұғалім қызмет ететін үздік ауыл мектебі

Маңғыстау облысындағы Түпқараған ауданы Ақшұқыр ауылында 2014 жылы ашылған Ақшұқыр-мектеп лицейі білім беру саласында "Үздік ауыл мектебі" ретінде дараланады. Бүгінде 1507 оқушыға білім беріп отырған білім ошағында 123 мұғалім қызмет етеді. Бұл туралы Түпқараған ауданы әкімдігінің баспасөз қызметі хабарлады.

Сондай-ақ, бұл мектеп кадрлық ерекшеліктерімен де назарға ілігуде. Өйткені, аталған ұжымда 30-ға жуық ер мұғалім қызмет етсе, олардың ішінде: 2 — шебер-педагог, 3— зерттеуші педагог, 5— сарапшы педагог, 7— модератор-педагог қызмет сапында.

Бәсекеге қабілетті жастардан тұратын, түрлі пәндерден сабақ беретін ер ұстаздар қашанда жеңіс тұғырынан түспеген.

«Қолынан ерекше іс келетін технология пәнінің ұстазынан бастап, Бакуде өткен халықаралық байрақты бәсекеде алтын тағып, шәкірттері жеңіс шыңнан түспейтін дене тәрбиесі пәні мұғалімі, есепке жүйрік регат-математик, үздік тарихшы ұстаз, қазақ тілі мен әдебиеті пәнінінен сабақ беретін — ақын, актер, жүргізуші ұстаздар, әнші, жыршы, шахматшы, кәсіпкер, БӘД пәні ұстаздары сынды сегіз қырлы бір сырлы ер ұстаздарымызбен мақтанамыз. Олардың ерекше қарым-қабілеттері мен жігерлерінің арқасында көптеген байқауларда бәйгені бермейміз. Бұл - жалынды жастардың жаңашылдыққа құмар білімдерінен», - деді мектеп директоры Қаламқас Қалиқызы.

Ақшұқыр мектеп-лицейі 7 жылдың ішінде елеулі жетістіктерге қол жеткізген.

«Жоғары білімді мамандардың жетістіктері де аудан, облыс деңгейінде емес, көбісі республикалық бәйгелерде ат оздырған жүйріктер», - деді аудандық білім бөлімінің басшысы Айбаршын Утесбаева.

«Дарын» республикалық ғылыми-практикалық орталығының шешімімен екі дүркін «Үздік ауыл мектебі» аталымы, Маңғыстау облыстық білім басқармасының шешімімен «Үздік олимпиадалық мектеп», екі рет «Үздік ауыл мектебі», Маңғыстау облысы әкімдігінің ұйғарымымен «Үздік мектеп-лицей», «Орта білім беретін Үздік ұйым», «Табиғатпен үндес мектеп», ҚР БҒМ жанынан құрылған арнайы комиссияның шешімімен "Үздік олимпиадалық ауыл мектебі» номинациясымен марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.