Мұнайлы ауданында медресе құрылысы басталды. Аудан келбетіне көрік қосатын діни нысанның жалпы көлемі 4000 шаршы метрді құрайды. Бұл туралы Мұнайлы аудандық орталық «Миғраж» мешітінің бас имамы Руслан Баймұқанов мәлім етті.
«Медресе 100 орынға шақталған. Мұнда қазіргі заман талабына сай бассейн, акт зал, халыққа арналған асхана және шәкірттердің жеке асханасы болады. Құрылыс жұмыстарын 1 жарым жыл ішінде аяқтаймыз деп жоспарлап отырмыз», - деді Руслан Баймұқанов.
Карантин талаптарына сәйкес мешітте дәріс жүріп жатқан жоқ. Жалпы мешітте 3 ұстаз бар. Руслан Баймұқановтың сөзінше медресе ашылса қосымша ұстаздар қажет болады.
«Білім алу шарапатты іс екендігі даусыз. Ал сол білімпаздардың білім алуына себепкер болу ше? Оның сауабы білім алумен пара-пар деп айтсақ әбестік емес. Дін шеңберінде болсын, жалпы адамгершілік тұрғысынан қарасақта мектеп пен медресе салу – бұл дүниеде де, ақыретте де игілікті, сауапты іс. Сондықтан медресе салу қазіргі таңдағы күн тәртібінде тұрған өзекті де өте маңызды істердің бірі әрі бірегейі. Осы себептен еліміздегі сауапты іске атсалысар жан көбейсе екен дейміз», - деді Мұнайлы аудандық орталық «Миғраж» мешітінің бас имамы Руслан Баймұқанов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
