Амал - алашқа ортақ мереке

Ақшұқыр ауылында Амал мерекесі кең көлемде тойланды. Әдеттегіше киіз үйлер тігіліп, дастархан жайылды. Ән мен күйден концерттік шара ұйымдастырылды. Ақшұқырдағы ақсақалдар мен ақ жаулықты аналарды аудан әкімі арнайы құттықтап, көрісе барды.

Амал - ынтымақтың, татулықтың мейрамы. Бұл күнді асыға күткен көпшілік қыстың аязды күндерінің артта қалғанына қуанады. Жайма-шуақ күннің жақсылық ала келетініне сенеді. Бір-бірімен төс қағыстырып көрісіп, емен-жарқын сәлемдескен халықтың көңіл-күйі бүгін көтеріңкі. Үлкендердің берген ақ батасында «Ақ мол болсын!», «Бас аман болсын!», «Болашақ жарқын болсын!» деген жақсы тілектер де молынан айтылып жатты. Мерекелік шараны ашып берген Түпқараған ауданының әкімі Айбек Қосуақов: - Амал - шуақты мейрам. Бұл күні жыл бойғы өкпе-реніш кешіріліп, адам да, табиғат та жаңа түрге енеді. Ақшұқырдағы амал тойына жиылған қауым да қыстан аман шыққанын тойлап, шат-шадыман күй кешуде. Жақсылық ұзағынан болғай, жақсы күндеріміз көп болсын, - деген тілегін жеткізді.

Дәстүрден таймаған ақшұқырлықтар тәуелсіздіктің 30 жылдығына арнап 30 түп көшет отырғызу рәсімін жасады. Дәл бүгін бұл рәсімнің жасалуы жас көшеттердің көктемнің шуағынан нәр алып, жер ананың баурайынан өсіп-өнетініне сенді. Сүт, айран құйды. «Атаңнан мал қалғанша, тал қалсын» дегенді естіп өскен ұрпақтың бұлай жасауы заңдылық іспетті.

Ақшұқыр ауылының тұрғыны Марат Қани Амал мерекесінің ауылда тойлануына қуанышын жеткізді: - 14-наурыз – ескіше жылдың басы. Осы орайда барша жерлестерімді айтулы жаңа жыл мерекесімен құттықтаймын. «Ескі жыл есіркесін, жаңа жыл жарылқасын». Басымыз аман, бауырымыз бүтін болсын», - деді.

Ұлттық тағамдар мен қолөнер бұйымдарының жәрмеңкесі де өтті. Ал сол жәрмеңкеге келгендерге ұйымдастырушылар тарапынан қыс бойы сақтаған сүр мен қымыз ұсынылды. Ал Амалға арналған мерекелік кештің негізгі бөлігі мәдениет үйінің ауласында орналасқан киіз үйлерде өтті. Өнерпаздар ән айтып, би билеп, мерекеге жиналған көпшіліктің мерейін өсірді. Ауылдың қыз-келіншектері өнерпаздар қойылымын тамашалай келгендерге, ауыл үлкендеріне наурыз көже мен бауырсақ ұсынып, ізет білдірді. Ұлттық спорт түрлерінен жарыс өтті.

***

Амал мерекесін қызылөзендіктер де тойлады. Бұл күні ертемен мейрамға байланысты жас көшеттер отырғызу рәсімі жасалды. Кейін ауылдық мәдениет үйінде өткен мерекелік концертке ұласты.

- Наурыз мерекесін маңғыстаулықтар ерте тойлаймыз. Наурызды бұрынғыларымыз Амал деп әсемдеген. Оның мағынасы «Жаңа күн» екенін де көпшілігіміз білеміз. Әлемде болған пандемиялық жағдайға байланысты көптеген мерекелік шаралар тойланбай қалды. Өкінішті, әрине. Наурыз мейрамын асыға күткендеріңіз сезіліп тұр. Жер ана иіп, Арқаның ызғары ішін тартып, өкпе-реніш ұмытылып, арқа-жарқа көрісетін күн. Жаңа күннің парағы жақсылықпен басталуда. Лайым да солай болғай, - деді ауыл жұртын мейраммен құттықтай келген аудан әкімінің орынбасары Ж.Қайнарбаев.

«Ұлыс күні қазан толса, ол жылы ақ мол болар. Ұлы кісіден бата алса, сонда олжалы жол болар» деген ескі мақал бар емес пе?! Бұл күні көрісіп келген жастарға ақсақалдарымыз батасын берді. Кимешек киген өнерпаз әжелер сахнада ән орындап, жас өнерпаздарға үлгі көрсетті. Жастар да бұл күні қазақи нақыштағы ұлттық киімдерін киіп, ән де орындады, би де биледі.

Наурыз көжесіз мерекенің сәні болар ма?! Әдеттегіше, ең дәмдісі өзара сынға түспегенмен, көпшілікке жететіндей мол көже тойлаушы қауымға ұсынылды. Көже пісірушілер үлкеннің де, жастың да жақсы ықыласына бөленді. Одан бөлек, мәдениет үйінің дәлізінде ұлттық өнерді дәріптейтін қолөнершілердің бұйымдарынан көрме ұйымдастырылды. Қазақи ұлттық киім, құрақ түрлерінен көрпе, жастық көрмеде арзан бағада сатылымға түсті.

Ауыл жастары арасында қазақ халқының дәстүріне айналған кір тасын көтеру, қол күшін сынасу, арқан тартыс секілді ұлттық спорттық ойындары ұйымдастырылып, жеңімпаз жастар ауыл әкімінің арнайы дипломы, медальдары және ақшалай сыйлықтармен марапатталды.

Өз тілшіміз

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.