Түпқарағандық жігіт Венгрияда ұшқыш мамандығын меңгеріп жүр

Түпқараған ауданы Таушық ауылының тумасы Асқарбай Қызылғұлов Еуропаның үздік жоғары оқу орындарының бірі - Дебрецен университетінің «Азаматтық авиация» факультетінде білім алуда, деп хабарлайды mangystaumedia.kz сайты Түпқараған ауданы әкімдігінің баспасөз қызметіне сілтеме жасап.

Әкесі мұнай мекемесінде жүргізуші, анасы ауыл мектебінде тәжірибелі математика мұғалімі. 2018 жылы Асқарбай Ақтау қаласындағы Назарбаев Зияткерлік мектебін тәмамдаған.

«Болашақта ұшқыш болуды армандап, алдыма үлкен мақсат қойдым. Бүгінде Еуропаның үздік оқу орнында білім алып жатырмын. Мұнда аса қатты өзгешелік жоқ және университет маған қатты ұнайды», - деді Асқарбай Қызылғұлов.

Дебрецен университеті – Венгриядағы ең көне жоғары оқу орындарының бірі. Көне болса да студенттерге теория мен практиканы ұштастырып білім беретіндігімен танымал. Ұшқыш мамандығын 3,5 жыл ғана оқытады. Асқарбай оқуын сәтті тәмамдаған соң, отандық әуе компанияларының бірінде жұмыс істегісі келеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.