Ислам әлемі жыл сайын асыға күтетін Рамазан айы өте қасиетті, мәртебелі ай. Мұсылман ғалымдарының айтуынша, бұл айда жасалған бір парыз, басқа айларда жасалатын жетпіс парыздай болады екен. Ал садақа берудің сансыз сауабын білмейтін мұсылман жоқ. Қасиетті Құранда: «Сүйген нәрселеріңді (Алла жолында) жұмсамайынша (садақа бермейінше), жақсылыққа қол жеткізе алмайсыңдар. Не жұмсасаңдарда Алла оны сөзсіз біліп тұрады» («Имран» сүресі, 92-аят),- делінген.
Осы айда Ақтау қаласында тұратын тұрмысы төмен бірнеше шаңыраққа тілі түркі, діні бір бауырлас түрік халқының сәлемдемесі жетті.
Түркия Республикасының Ақтау қаласындағы Бас консулы Мұзаффер Ақйылдырым облыстық Беке ата мешітінің ауласында аз қамтылған 50 отбасыға түркиялық «Türkiye diyanet vakfi» қорымен бірлесіп дайындаған «Рамазан сыйлығын» үлестірді.
- Түркиялық мұсылмандардың жалынды сәлемі мен ыстық ықыласы үшін ризашылығымызды білдіреміз. Алла бүгінгі игі істеріңізді қабыл етіп, мол сауаптан жазсын. Қасиетті Рамазан айы баршамызға мүбәрак болсын, - деген бас имам Әнуар қажы Ізімбайұлы Мұзаффер Ақйылдырым мырзаға алғысын жеткізді.
Ішінде ұн, күріш, қант, тұз, макарон өнімдері, май, шай сияқты бірінші қажетті азық-түлікпен қатар балаларға арналған тәттілері де бар қомақты қораптардың сыртында: «Расында, мүміндер–бір-біріне бауыр» деген Құран аятына шын көңілден сенетін Түркиядағы бауырларыңыз ретінде Рамазанның шаттығын өздеріңізбен бөлісуді зор бақыт деп білеміз.
Рамазан айына арнап жолдаған осынау сыйымызбен қатар жалынды сәлеміміз бен ыстық ықыласымызды да жолдап отырмыз. Түркиялық бауырларыңыз ретінде сіздер үшін алақан жайып, дұға-тілек тілейміз әрі сіздерден де дұға-тілек күтеміз» деп жазылған. Бұл қораптарды қолдарына алған жерлестеріміз түбі бір туыс халыққа ризашылықтарын білдірді.
Ертеңіне Түркия Республикасының Ақтау қаласындағы Бас консулы Мұнайлы ауданының орталығы Маңғыстау кентіндегі орталық Миғраж мешітінің жанында 40 отбасыға осындай сыйлық таратты.
Сондай-ақ Бас консулдық Түркия елінің 8 адамға арналған Рамазан тартуын Жаңаөзен қаласындағы Шаңырақ ш/а қалалық мешітіне тапсырды. Өңірдің басқа да азаматтары осындай сыйлыққа ие болды.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
