Басқұдық ауылдық округінің тұрғындары коммуналдық қызметтердің қоқыс шығарудағы нашар жұмысына шағымдануда. Бұл мәселені Басқұдық ауылының тұрғындары бірнеше рет әлеуметтік желіде және Маңғыстау облысы әкімдігінің телеграм-каналында көтерген, - деп хабарлайды mangystaumedia.kz сайты.
«Қоқыс жиналады, сосын желмен көшеге ұшады», - дейді Басқұдық ауылдық округінің тұрғындары.
Басқұдық ауылдық округінде 38 мың адам тұрады. Ауданда жеке тұрғын үй құрылысының иелерімен келісімшартқа отырып, қатты тұрмыстық қалдықтарды шығарумен айналысатын «Мұнайлы қызмет» кәсіпорнының жеті тұрғын үй алқабында 70 қоқыс контейнері бар.
«28 маусымда ТҚҚ кестеге сәйкес шығарылды. Бірақ Құрбан айт мерекесіне байланысты тұрғындардан қоқыс бір күнде жиналған. Өкінішке қарай, қызмет көрсететін ұйыммен келісімшарт жасамаған кейбір ауыл тұрғындары да қоқыстарын контейнерлеріне тастап кетеді», - деп атап өтті әкімдіктегілер.
Мұнайлы ауданы, Басқұдық ауылдық округі әкімдігінің хабарлауынша, қазір мерекелік демалыста жиналған қоқыс шығарылып жатыр.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
