Мұнайлы ауданының әкімі Ержан Күмісқалиев Атамекен және Басқұдық ауылының тұрғындарымен кездесті, деп хабарлайды mangystaumedia.kz сайты аудан әкімдігінің баспасөз қызметіне сілтеме жасап.
Қос ауылдың тұрғындары қоқыстың уақытылы алынбауы, су тарту, шұрық-тесік жолдарды жамау, бұралқы иттерден туындайтын қауіптен балаларды қорғау және жарықшамдардың жанып кетуі сынды мəселелерді ортаға салды.
Аудан әкімі Ержан Көпжасарұлы алдымен Атамекен ауылында атқарылып жатқан жұмыстар мен алдағы жоспарларды тілге тиек етті.
- «Қаламқас» тұрғын массивінде ұзындығы 1 шақырымды құрайтын тротуар салынды. Жыл басынан бері 600-ден астам жарық шам ауыстырылды. Алдағы уақытта 1134 дана көше жарық шамы замануи лед-шамға ауыстырылады. Қазіргі таңда «Жалын» көшесінде ойын алаңының құрылысы басталды. Алдағы уақытта 3 тұрғын-үй массивінде дренаж жүйесін қондыруға конкурс жарияланып, жұмыстары жүргізіледі. Яғни, «Көктем», «Шағала», «Арай» массивіне қойылады. Сондай-ақ, асфальт мәселесі біртіндеп шешіледі,-деді Ержан Күмісқалиев.
Сөз кезегі ұсыныс-пікір, сұрақтарға берілді. Тұрғындар көшелерге асфальт жабындысын төсеу, жер асты суды кəдеге жарату, күл-қоқыстан тазарту, жұмыссыздық, «Болашақ», «Көктем» тұрғын-үй массивінде масаны жою, иттерді аулау, ауыз су мәселелерін талқыға салды. Әсіресе, жаз мезгілінде суға мұқтаждықты жою мəселесі сөз болды.
- Су мәселесі жыл сайын көтеріледі. Мысалы, мен тұратын «Думан» көшесіне су толықтай тартылмаған. Сонымен қатар, жарық жоқ, шамдарды ауыстыру керек,-деді ауыл тұрғыны Гүлшәт Жәдігерова.
Аудан әкімі Ержан Күмісқалиев тұрғындар көтерген мәселелердің әрбіріне жеке-жеке тоқталып, сұрақтарға жауап берді.
Халықтың айтқан әрбір ұсынысын үнемі назарда ұстап, олардың оңтайлы шешілу жолдары қарастыратынын жеткізді.
- Әрқайсыңыздың ұсынысыңыз, сұрағыңыз өзекті. Жол бойынша «Қаламқас» тұрғын-массивінде 8 шақырым, «Арай» тұрғын-массивінде 8 шақырым асфальт төселеді. Конкурс тамызда аяқталып, құрылыс жұмыстары басталады. Ал, қалған массивтердегі жолды күтіп-ұстау мекемесі тарапынан тегістеу жұмысын жүргіземіз. Орталық жол бойынша бюджеттен қаражат бөлінген бойда жұмыстар басталады. Ит аулау бойынша тапсырма беремін. Бірақ, әр итті иесі өз аулаларында байлап ұстауы тиіс. Ал жер асты суынан арылу үшін «Шаңырақ» мейрамханасы алдынан Кіші Оймашы көліне дейін жер асты арығы салынады. Масаны жоюға жұмыстар жасалады,-деді аудан әкімі Ержан Күмісқалиев.
Ал, су бойынша аудан әкімінің орынбасары Нұрхан Әлиханұлы жауап берді.
- Атамекен ауылына 2650 текше метр су келіп тұр. Жалпы, ауданға «Каспий су тұщыту» зауытынан күніне 12 мың текше метр су келеді, бірақ қажеттілік тəулігіне 30 мың текше метрді құрайды. Сондықтан кесте бойынша берілетін суды үнемдейік, -деді Нұрхан Әлиханұлы.
Ал, Басқұдық ауылында тұрғындар сайлау, қоқыс тазалау, жол кедергісі мен жол белгілерін салу, қоғамдық көлік, жұмыссыздық, иттерді аулау, ауыз су, мектеп құрылысы, жарықшам, жағымсыз иіс мәселелерін көтерді.
- Қыста жарықшамдар жанбайды, үнемі қараңғы. Көшелер тегістеліп жатыр, құдықтар жабылады.Тəулігіне 1,6 текше метр су көлемі ауылға жетпейді. Балауса көшесінен Арман көшесіне мүлдем жетіспейді. Қоқыс аптасына кемінде 2 рет алынсын, 1 көлік жетпейді, ең болмаса жаз уақытында қолға алыңыздар,-деді Гүлжамал Оразғалиева.
Аудан әкімі Ержан Күмісқалиев мәселелерді оңтайлы шешуге жұмыстанатынын жеткізді.
- Жағымсыз иіс бойынша кәсіпкер шошқа фермасын жоюға келісті. Ал, асфальт бойынша «Ауыл-ел бесігі» бағдарламасы аясында келер жылы 7 жобаға қаражат бөлу көзделді. 58 шақырым жолға жобалық-сметалық құжаттама дайындалуда. Қаражат бөлінсе құрылыс басталады. Алдымен халық көп жүретін жол құрылысы басталады. Мысалы, «Айгерім» дүкенінен 16 мектепке дейінгі жол бөлігіне жөндеу жүріп жатыр. Ал, жарықшамдар лед лампалармен алмастырылады. Қоғамдық көлікпен кейбір категорияларға тегін жүру бойынша арнайы топтарға облысқа өтініш берілді, бюджеттен қаралуы керек,-деді аудан әкімі Ержан Күмісқалиев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
