Серікбай Трұмов: Орта және шағын бизнеске оң өзгеріс керек

Бейнеу ауданының әкімі Бейнеубек Әбілов тұрғындар алдында есеп берді, - деп хабарлайды mangystaumedia.kz сайты Маңғыстау облысының әкімдігіне сілтеме жасап.

Ауданның өткен жылдағы жалпы әлеуметтік экономикалық дамуы мен 2020 жылдағы міндеттері сараланды. Қорытынды жиынға облыс әкімі Серікбай Трұмов және басқарма басшылары қатысты.

Әлеуметтік сала, инфрақұрылым, ауыл шаруашылығы және жұмыспен қамту мәселелері бойынша атқарылған жұмыстар жан жақты баяндалды.

Аудан бюджетінің бүйірін толтыратын салықтардың түсімі де былтырғы жылмен салыстырғанда бірнеше пайызға артқан. Яғни 43,3% көбейіп, 14,4 млрд теңгені құрады. Меншікті кірістердің орындалысы 105,5% болса, даму бюджетті 100%, республикалық трансферттері 99,2% жетті. Өңір экономикасын өрге сүйреп отырған өнеркәсіп саласында атқарылған жұмыстарға кеңінен тоқталып өтті. Өз ісін ашып, кәсіпкерлікке бет бұрған бейнеуліктердің саны артып келеді.

«Бизнестің жол картасы-2020» бағдарламасы аясында өткен жылы 113,3 млн теңгеге 11 жоба мақұлданып қолдау көрсетілді. Оның ішінде: 49,4 млн теңгеге 2 жоба субсидияланды, 62,9 млн теңгеге 8 жоба кепілдендірілді. Жаңа бизнес идеяларға 1,0 млн теңге көлемінде мемлекеттік грант берілді. Мониторинг бойынша ауданда 845 кәсіпкерлік нысан халық игілігіне жұмыс жүргізуде. Негізгі өнеркәсіп өнімінің көлемі 81,8 млрд. теңгеге, капиталға салынған инвестиция 36,4 млрд теңгеге жетті. Өнеркәсіптік өндірістің нақты индексі 100,8% болса, инвестиция көлемі 104,5% құрады.

Білім беру мен спорт саласында да оң өзгеріс байқалады. 2018 жылы бұл салаға 7,3 млрд теңге бөлінді. Нәтижесінде 10 мектепте ІТ-кабинеті іске қосылды. Сондай-ақ Опорный орта мектебінің мүмкіндігі шектеулі балаларына арналған құны 2,5 млн теңге құрайтын сенсорлық кабинетпен жабдықталып, спорт мектебінде "Мүмкіндігі шектеулі жандарға арналған дене шынықтыру кабинеті" ашылды. Мұнда жастар қол күресі, үстел теннисі, тоғызқұмалақ және шахматпен дойбы ойындарын ойнап бос уақыттарын тиімді өткізе алады. Қазіргі уақытта аудандағы 2 колледжде 1 189 студент, 25 білім беру ұйымында 18 365 бала оқыса, 23 балабақшада 2 561 сәби тәрбиеленуде. Бұл салада 5 123 адам еңбек етеді, оның 2 735 педагог мамандар. 1 865 мұғалім білім жетілдіру курстарынан өтті.

Жұмыссыздық мәселесі Бейнеу ауданында да өзекті. Ауданда 4 рет бос жұмыс орындарының жәрмеңкесі өтіп, ұйым тарапынан ұсынылған 421 жұмысқа 175 адам орналасуға мүмкіндік алды. Жұмыспен қамту ұйымдары арқылы 1 196 адам тұрақты жұмысқа орналастырылып, 105 адам әлеуметтік жұмыс орындарына жіберілді. Жастар практикасына 357 жас маман уақытша жұмысқа қабылданып, оның 55-і тұрақты жұмысқа орналасты. 791 адам ақылы қоғамдық жұмысқа тартылды. Сонымен қатар «Ауыл - ел бесігі» бағдарламасы аясында құны – 184,5 млн теңге болатын 5 көшенің авто жолына жөндеу жұмыстары жүргізілді.

«Нұрлы жол» бағдарламасы аясында құрылысы жүріп жатқан, 19,8 млрд теңге болатын «Бейнеу-Ақжігіт-Өзбекстан Республикасы шекарасы» автомобиль жолының 80 км асфальт төселді.

Есепті баяндамадан кейін облыс әкімі халық тарапынан қойылған сұрақтарға жауап беріп, аудан әкіміне бірқатар тапсырмалар берді. Олар халық тұтынатын тауар бағасын бір қалыпты ұстау, міндетті әлеуметтік медициналық сақтандыру барысын халыққа түсіндіру, жедел-жәрдем көлігін көбейту, ауылішілік жолдарды жөндеу т.б. Ең бастысы аудандағы орта және бизнесті дамыту керектігін тапсырды. Барлық тұрғындардың ұсыныстары қабылданып, мәселені шешу жолдары қаралатынын жеткізді.

Маңғыстау Медиа

Редакциялық пікір мақала авторлары мен оқырмандардың пікірлерімен сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты / Мнение редакции может не совпадать с мнением авторов статей и читателей. Ответственность за достоверность изложенной в статьях и комментариях информации несут авторы.