Бейнеу ауданы Сам ауылында Ұлы Отан соғысының ардагері Шомақ Ізбасаровтың тұрған үйіне ескерткіш тақта орнатылды. Бұл туралы mangystaumedia.kz сайты Бейнеу ауданы әкімдігінің баспасөз қызметіне сілтеме жасап хабарлайды.
«Ескерткіш тақтаны орнатуды ауыл ақсақалдары бірауыздан қолдады. Соғыс және еңбек ардагері Шомақ Ізбасарұлы 3 жыл бұрын өмірден озды. Биыл 100 жасқа толар еді. Шомақ ағамыз ауылшаруашылық саласының өркендеуіне аянбай қызмет жасаған үлкен азамат. Лайықты адамға ескерткіш тақтаның қойылуы - ол жастарға берер тәрбие. Ардагердің істеген істері, артында қалдырған еңбектері өсіп келе жатқан біздің жастарымызға үлгі» - деді Сам ауылының әкімі Нұрғабай Әлімбаев
Шомақ Ізбасаров 1920 жылы Маңғыстау облысы, Төбеқұдық жерінде дүниеге келген. 1938 жылы Таушық көмір өндіру кен орнында жұмыс істеген. Көмір өндіруді 115 пайызға орындап, «Стахановшы» атанған. 1946 жылы елге оралған. 1947 жылы отбасын құрған. 1947 жылдан жылқышы, 1954-1972 жылдары қой баққан. 1972-1980 жылдары совхозда жұмысшы болған. 1980-1985 жылдары қой бағып, зейнеткерлікке шыққан.
1942 жылы әскер қатарына шақырылып, Форт-Шевченко, Атырау –Барнаул шаңғышылар батольонында болған. Украина, Беларуссия, Польша және Германия жерлерінде соғысқа қатысқан.
«1941-1945 жылдардағы ҰОС Жеңісінің – 20, 50, 60, 65 жылдығы» медалдары «КСРО Қарулы Күштерінің-50 жылдығы» медалы, «Украинаны неміс фашистерінен азат еткеніне - 60 жыл медалы, «Беларуссияны неміс фашистерінен азат еткеніне - 65 жыл медалы, Белгі «Фронтовик» 1941-1945 ж.ж., «Астанаға-10 жыл» медалімен марапатталған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
