Ақтауда маңғыстаулық келіншектер ұлттық қолөнерді ұлықтады

Ақтауда облыстық ғылыми-әдістемелік және мәдени қызмет көрсету орталығының қолдауымен «Сөз бен саз» бағдарламасының 76-шы «Ұмытпайық, ұлықтайық ұршықты» атты кеші өтті, деп хабарлайды mangystaumedia.kz.

Маңғыстау облысы бойынша 2 қала мен 5 ауданнан қатысқан 46 үміткердің ішінен іріктеу турынан 15 нәзік жанды өтті. Олардың арасынан ширек финалға 10 адам өтсе, жартылай финалға 7 адам сұрыпталып шықты.

Ал финалда 5 үміткер өзара мықтыны анықтады. Елімізге белгілі мәдениет майталмандары мен мөрлі шеберлер Тамара Жұмалиева, Аққалам Өмірбаева, Түймеш Абдуллаева, Медине Орынбасарқызы және Мәнет Шырақбайлардан құралған әділ қазылар алқасы шын мықтыны анықтады. Нәтижесінде, ынталандыру сыйлығын ақтаулық Тілектес Көңілімқосқызына табыстады. Жүлделі 3 орын - қарақиялық Назипа Науқановаға бұйырды. 2 орын Гүлбану Оразбековаға берілсе, 1 орын ақшұқырлық Лиза Басшиеваға беріліп, 100 000 теңге ақшалай сыйлық берілді. Сайыстың бас жүлдесі Мұнайлы ауданынан келген Венера Палуановаға бұйырып, 150 000 теңге ақшалай сыйлыққа ие болды.

«Мұндай сайыстың маңызы қоғам үшін аса өзекті. Бүгінде ұлттық қолөнерді ардақтау ұмытылып барады. Оның ішінде жүн түтіп, ұршық иіруді көпшілік қыз-келіншектер біле бермейді. Осы орайда дәстүрді жаңғыртып, оны ұлықтаудың өскелең ұрпақ үшін маңызы зор деп білемін», - деді сайыс жеңімпазы Лиза Басшиева.

Сайыс барысында Жаңалық Бисенғұл, Ақпанар Түметова, Жұмагүл Мұрсалова, Айгүл Құбаш, Оспан Құлсымақ, Әлия Қарамұқан, Ұлболсын Смадиярова, Жібек Марқабаева, Жомарт Маратов, Арай Досымқызы, Нұрхат Халықов, Нұрсинат Жакешова, «Жібек» жетіген мектебі, «Нарату» домбырашылар ансамблі және «Арна» тобы өнерлерін ортаға салып, көрермен көңіліне ұмытылмас әсер қалдырды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.