Ақтау тұрғындары суық судың жоқтығына жаппай шағымдануда

Айтуларынша, 21 мамыр, жексенбі күні су ескертусіз өшірілген. Неліктен бұлай болғанын анықтау үшін тиісті қызметтерге хабарласқанымен нақты жауап ала алмаған. Маңғыстау облысы әкімінің Telegram чатында қойылған көптеген сұрақтардан кейін салқын судың апат салдарынан ажыратылғаны белгілі болды, деп хабарлайды mangystaumedia.kz

Ақтау қаласының бірқатар шағын аудандарында ауыз су ескертусіз сөндірілген. Бұл туралы 9, 10, 11, 11А, 12, 13, 14, 15, 16 және 17 шағын аудандардың тұрғындары хабарлады.

«Ескертуі керек еді. Тек осындай сарсаңға салып қояды. Ыстық су жоқ, қазір енді ауыз су өшірілді. Кешке дейін сусыз отырдық. Менің мектеп жасындағы балаларым бар. Киімдерін жууым керек. Не істерімді білмеймін, не жыларымды, не күлерімді. Айта кеткім келетіні, су ай сайын толық тарифпен алынады. Судың сапасы сұмдық енді, тамаққа да, тұрмыстық қажеттіліктерге де пайдалана алмайсың», – деп жазады Ақтау қаласының 14 ауданы, 8 үйінің тұрғыны Людмила.

- Күйеуім кезекшілікте, өзім екі баламен үйдемін, су толтырып алып үлгермедім. Балалармен сусыз бір күн - оңай сынақ емес. Не дәретхананы ағыза алмаймыз, балаларды жуындыра алмаймыз. Тым болмаса алдын ала ескертсе, баклажкаға су жинап алар едік. Мұндай жағдай бірінші рет болып отырған жоқ, – деп ашуланады 12-шағын ауданның тұрғыны Әйгерім.

-Бізде үнемі суық су тапшылығы бар. Су не әлсіз ағынмен келеді, немесе мүлдем болмайды. Төртінші-бесінші қабаттарда су деген атымен жоқ. Біз кір жуғыш машинаны іске қоса алмаймыз, ыдыс-аяқты жуа алмаймыз, тамақ пісіре алмаймыз. Бұл су мәселесі қашан шешіледі? Шыдауға күш қалмады, – деп жазады зейнеткер Валентина.

КЖСА мәліметінше, 21 мамырда 24-ші шағын аудандағы Әскери-теңіз институты маңында ауыз су құбыры апатты жағдайда жарылған.

— Біз су жеткізуді уақытша тоқтатуға мәжбүр болдық. Магистральдық ауыз су құбыры осы мекен-жайдан өтетіндіктен, бұл уақыт суды толығымен тоқтату үшін қажет болды, содан кейін дәнекерлеу жұмыстары басталды, - деп түсіндірді КЖСА.
Сол күні кешкісін ауыз суды беру қайта жанданған.

Ал «МАЭК» ЖШС баспасөз қызметі Ақтау қаласында 22-28 мамыр аралығында ыстық су болмайтынын хабарлады.

- Жылу желілерінің гидравликалық сынақтарын дайындауға және өткізуге байланысты облыс орталығында ыстық су беруді тоқтату 2023 жылғы 22 мамырда сағат 00:00-ге ауыстырылды. Жұмыс 2023 жылдың 28 мамыры сағат 24:00-ге дейін жүргізіледі. Уақытша қолайсыздықтар үшін кешірім сұраймыз, - деді компанияның баспасөз қызметі.

Бұған дейін Ақтауда жылу желілерін гидравликалық сынақтан өткізуге байланысты ыстық су беру 12 күнге тоқтатылатыны хабарланған болатын.