«Qazaqsha TOUR 2020»: Үш мыңға жуық жастың басын қосты

Ақтауға танымал әнші Мирас Жүгінісов және белгілі блогерлерден құралған T-Jokers командасы келді. Негізгі мақсат - «Qazaqsha TOUR 2020» жобасы аясында қазақ тіліндегі контентті дамыту. Шара Қазақстан жастары конгресінің ұйымдастыруымен, Маңғыстау облысының жастар ресурстық орталығының қолдауымен өтті, - деп хабарлайды mangystaumedia.kz сайты.

Инстаграм әлеуметтік желісінде 600 мыңнан астам оқырманы бар «T-Jokers» командасын көру үшін 3000-ға жуық жас келген. Бес жыл бұрын көңілді әрі қызықты бейнероликтер түсіруді бастаған тараздық жігіттер Жансерік Қадырбаев, Ербол Хамза және Марғұлан Әден – қазір әлеуметтік желідегі танымал жұлдыздар. Олардың күн сайын инстаграм желісіне жүктейтін сурет-бейнероликтерін орта есеппен жарты миллион адам тамашалайды.

«Бүгінгі жастар ғаламторды, әлеуметтік желілерді көп қолданады, жаңалықтар оқып қана қоймай, сурет, бейнероликтермен бөлісіп, қызықты мақалалар, көңілді бейнелерді тамашалайды. Сол үшін жастардың контенті қазақ тілінде болғаны маңызды. Қазақстан жастар конгресінің мұрындық болуымен өтіп жатқан «Qazaqsha TOUR 2020» шарасы Ақтау қаласынан басталды. Мақсатымыз – қазақ тіліндегі контентті дамыту, қазақи блогерлер арқылы жастарға дем беру.

«T-Jokers» командасы мен Мирас Жүгінісов арнайы бағдарлама жасап, өңірлерді аралауды шештік. Ақтаудан бастадық, содан соң Нұр-Сұлтан, Алматы, Шымкент және Тараз қалалары тұр. Осы бес қаланың жастарымен кездесу көзделген. Кездесу барысында жастарға блогерлікті қалай бастағанын баяндап, болашаққа пайдалы болар кеңестер беріп, мотивациялық әңгімелер айтады», - деді Қазақстан жастары конгресінің атқарушы директорының орынбасары Ерғазы Әзімханұлы.

Ерекше кеш кезінде әлеуметтік желіде жұлдыздары жанған Жансерік Қадырбаев, Ербол Хамза және Марғұлан Әден «T-Jokers» командасын қалай құрғаны туралы айтып, жастардың сұрақтарына жауап берді. Шара барысында әнші Мирас Жүгінісов ән шырқап, көрермендер көңілін серпілтті.

Ханым ҚУАТ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.