"Теңізшевройл" облыстық табиғи ресурстар басқармасына 2 кеме табыс етті

«Теңізшевройл» ЖШС әлеуметтік жобалары аясында Маңғыстау облысының табиғи ресурстар және табиғат пайдалануды реттеу басқармасына 2 кеме табыстады, деп хабарлайды mangystaumedia.kz сайты.

Қатарды толықтырған Kazboat маркалы кемелер табиғи ресурстар және табиғат пайдалануды реттеу басқармасына қарасты «Қызылсай» мемлекеттік өңірлік табиғи паркіне қызмет етпек. Басқару тақтасы алюминнен жасалған кеме 500 келіге дейін жүк көтеруге қауқарлы.

«Бриз» яхта клубының аумағында өткен салтанатты шараға облыс әкімінің орынбасары Бақытжан Қашақов қатысты. Компания өкілдеріне алғысын жеткізген Бақытжан Аманжолұлы олардың берген жабдықтары браконьерлерді дер кезінде құрықтауда басты рөл атқаратынын атап өтті.

Айта кетейік, «Қызылсай» мекемесі ерекше қорғалатын табиғи аумақтардағы жануарлар дүниесі мен өсімдік түрлерін қорғап, қоршаған ортаның бүлінбеуі мен браконьерлерге қарсы жұмыстар жүргізеді. Мекеменің құрамына 1 өңірлік парк және 6 жергілікті маңызы бар 6 қаумал кіреді.

Өткен жылдың тамыз айында құны 45 млн теңгені құрайтын жабдықтармен қамтамасыз еттік. Біз өңірдегі экожүйесінің сақтаудың маңыздылығын түсінеміз. Сыйға тартылған жабдықтардың пайдасы туралы оң пікірлер алып жатырмыз. Бұл біз үшін қуанышты жағдай. Бүгін «Қызылсай» паркіне Kazboat үлгісіндегі екі катерді табыстауға қуаныштымыз, деді «Теңізшевройл» ЖШС Үкімет және жұртшылықпен байланыс бөлімінің бас менеджері Рзабек Артығалиев.

Маңғыстау облысының табиғи ресурстар және табиғат пайдалануды реттеу басқармасы мен «Теңізшевройл» ЖШС арасындағы өткен жылдың 22 тамызында жасалған келіссөз жемісін берген еді. Алғашқы ытымақтастық нәтижесінде «Қызылсай» мекемесіне 7 вагон-үй, 22 фототұзақ пен 2 дрон сыйға тартылған болатын.

Осындай игі шаралар заңсыз әрі оңай жолмен олжаға кенелгісі келетіндердің жолын кесіп, жойылып бара жатқан табиғаттың құнды ресурстарын сақтап қалудың себепшісі болары сөзсіз.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.