Студенттер волонтерлік қызметі үшін ақшалай сыйақы алады

Маңғыстауда волонтерлерге арналған «Әлеуметтік студенттік кредит» жобасы іске асып жатыр. Биыл 569 студентке квота берілді. Бұл туралы Қоғамдық коммуникация орталығында «Студенттік әлеуметтік кредит» модулі жобасының үйлестірушісі Алтын Мамбетова мәлімдеді, - деп хабарлайды mangystaumedia.kz сайты.

«Әлеуметтік студенттік кредит» жобасының негізгі мақсаты – жастардың бойына әлеуметтік жауапкершілікті және азаматтық ұстанымды қалыптастыру. Қазіргі таңда аталған жобаға қатысу үшін 112 студент тіркелді.

Жоба үйлестірушісі Алтын Мамбетованың айтуынша, жобаға өңірдегі волонтерлік ұйымдар, органдар мен мекемелер қатыса алады. Олар еріктілерге арнайы жоба дайындау арқылы бос жұмыс орындарын құрып, студенттердің өтінішіне сәйкес жұмыс ұсынады.

«Тіркелу үшін «Qazvolunteer.kz» еріктілердің бірыңғай тұғырнамасында (www.qazvolunteer.kz) өтуі керек. Содан кейін ұйымдар студенттермен бірге оффлайн әңгімелесу өткізіп, бірлесе жұмыс істеуді бастайды. Яғни волонтер ретінде тіркелген студенттер балалар үйі, қарттар үйі, білім беру және басқа да әлеуметтік мекемелерде көмек көрсетеді», - дейді Алтын Ибрагимова.

Айта кетейік, қоғамдық жұмыстарды істеуге қабылданған студенттер ҚР Білім және ғылым министрлігі тарапынан ақы алатын болады. Мамандардың айтуынша, студенттерге арналған әлеуметтік кредит бойынша 20 сағат жұмыс істеген адам – 20 000, ал 50 сағатқа 50 000 төленеді. Бір студентке екінші рет әлеуметтік кредит берілмейді. Себебі ерікті жыл соңына дейін 70 сағаттан артық жұмыс істей алмайды.

Осы ретте Маңғыстау облыстық ішкі саясат басқармасы жастар бөлімінің бас маманы Қайрат Маратұлы аймақтағы мемлекеттік мекемелер мен үкіметтік емес ұйымдардың аталмыш жобаға белсенділік танытқанын қалайды.

«ЖОО-да оқитын жастар «Әлеуметтік студенттік кредитті» алу үшін өз өтініштерін беріп, онлайн платформаға тіркеліп жатыр. Алайда мекемелер мен үкіметтік емес ұйымдар тарапынан қызығушылық танытып, белсенділік көрсетіп жатқандар аз. Сондықтан да өңірдегі мекемелер әлеуметтік жоба ұсынып, ерікті жастардың пайдалы жұмыспен айналысуына мүмкіндік берсе екен деймін. Жыл соңына дейін 569 студентке квота берілді, әрі қарай тиімді пайдалану керек», - дейді Қайрат Маратұлы.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.