Зиянкестерді жоюға арналған заттар сатылатын орынға мониторингтік тексеріс жүргізілді

Бүгін, 18 ақпан күні зиянкестерді жоюға арналған улағыш заттарды сататын орындарға арнайы мониторингтік топ тексеріс жүргізді,деп хабарлайды mangystaumedia.kz сайты.

Қалалық СЭС-тің басшысы Асима Жұмабайқызы мен қала әкімінің орынбасары Серік Гусман мониторингтік топтың құрамында болды.

Олар 22-шағынаудандағы базарда зиянкестерді улайтын химиялық заттар сататын бірнеше дүкенге тексеріс жүргізіп, препараттарды сату барысында тұтынушыларға нұсқаулықтың міндетті түрде берілу керегін ескертті.

Бұл рейд тауарды сатушыларға түсіндіру жұмыстарын жүргізу және ҚР аумағында рұқсат етілмеген тауардың сатылмауы үшін жүргізіліп отыр. Тауарды сату кезінде сатушылар қолдану жөнінде толық нұсқаулық беруге тиіс. Соңғы ақпараттарға сәйкес, тұрғын үй-жайларға арналмаған препараттардың қолданылғаны жөнінде фактілерді анықтадық. Бүгінде бізде бұл процесті тоқтату үшін заңнамалық тетіктер жоқ. Жәндіктерді химиялық заттармен жою өлімге әкелетіндіктен, халықтың өз бетінше әрекет жасамауы үшін арнайы мониторинг тобын құрдық, дейді қалалық СЭС-тің басшысы Асима Жұмабайқызы.

Рейд барысында мониторингтік құрам кәсіпкерлерге зиянкестерді жоюға арналған улы препараттарды сатуда қандай шаралар қолданатыны жөнінде бірнеше сұрақ қойды.

Сондай-ақ, тексеріс аясында улағыш заттардың кейбірінде сапасына байланысты сертификаттың жоқ екенін анықталды.

Тұрғындардың сапасыз немесе сапалы химиялық улағыш заттардың дұрыс қолданбауы әсерінен адамдардың қатты улануына әкеліп отыр. Мониторингтік жұмыс аясында кәсіпкерлер мен тұтынушыларға ескерту жасалды. Негізгі мәселе препараттарды дұрыс қолданбау болып отырғандықтан, халықты арнайы мамандардың көмегіне жүгінуге шақырамыз, деді Ақтау қаласы әкімінің орынбасары Серік Гусман.

Серік Ғимранұлының айтуынша, химиялық заттарды сатып алғаннан кейін, СЭС-ке хабарласып, кәсіби мамандар қызметін пайданалуға болады.

Айта кетейік, зиянкестерді улайтын химиялық препараттарды қолдануда тұрғындардың сақтық шараларын дұрыс жасамауы әсерінен Ақтау қаласында адам өлімі мен бірнеше улану фактісі тіркелді.

Бұдан былай, мониторингтік топ зиянкестерді жоюға арналған заттарды сатуға және қолдануға байланысты түсіндіру жұмысын жалғастырмақ.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.