Ақтау мен Нью-Йоркті не байланыстырады?: Қазақстандағы ең жас облыс орталығы қалай өсіп, дамыды?

Өткен ғасырдың алпысыншы жылдары Маңғыстаудың сусыз, шөлді жерін игеру өз алдына ең күрделі мәселе болса, мұнда заманауи үлкен қала салу - негізгі міндет болды. Ұзақ уақыт бойы нақты атауы жоқ жабық қала болды: Алдымен Махачкала-40, Гурьев – 20, Шевченко, Ақтау. Ақтау - посткеңестік кеңістіктегі ерекше қала болды, деп хабарлайды mangystaumedia.kz.

Бірнеше жыл бойы қалаға кіруге мүмкіндік болған жоқ. Жабық болды. Өткен ғасырдың 60–жылдарының басында мұнда комсомол құрылысы басталды. Одақтың барлық жерінен жастар жиналды.

Түбекте тұратындарға тіршілік нәрі теңіз арқылы танкерлермен жеткізілген екен. Содан кейін су тұшытатын қондырғы салу туралы шешім қабылданды. Бұрынғы Кеңес Одағында халқы тұшытылған теңіз суын ішетін жалғыз қала Ақтау болды. Қалада бір кездері әлемде баламасы болмаған атом энергетикалық комбинаты орналасқан.

Ақтау теңіз жағалауында орналасқан қала. Мұнда көшелердің атауы жоқ. Қала Нью-Йорк сияқты шағын аудандарға бөлінген. Айтпақшы, Ақтау – үй нөмірлері ғимараттың жоғарғы жағында орналасқан Қазақстандағы аз ғана қалалардың бірі. Бұл өте ыңғайлы және алыстан көрінеді.
Қазір Ақтау – Қазақстанның жалғыз теңіз қақпасы, еліміздің Әскери-стратегиялық ірі торабы, сондай-ақ барлық Транскаспий бағыттары бойынша жүктерді ауыстырып тиеуді жүргізетін теңіз сауда порты.

Соңғы жылдары қала қарқынды өсті. Мұнда аз уақытта 10-нан астам жаңа шағын аудан пайда болды. Қала солтүстік бағытқа қарай ұлғайып келеді.

Облыс орталығының халқы да артуда. 2010 жылы тұрғындар саны 176 мың болса, қазіргі уақытта ресми мәлімет бойынша мұнда 218 мың адам, ал бейресми мәлімет бойынша – 300 мыңнан астам адам тұрады.

Фото: proaktau.com

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.