Ақтау жүргізушілері дизель отынының тапшылығына шағымданды

Автокөлік иелері қалада дизель отынын сатып алу болмай тұр деп мәлімдейді, mangystaumedia.kz.

- Қала аумағында 20 литрден беріліп жатыр, таң атар-атпас жанармай бекетін жағалап, алып үлгеруге тырысудамыз. Бүгін бізге дизель отынының қоры тек төрт күнге ғана жететіндігін хабарлады - деп жазуда қала тұрғындары.

Маңғыстау облысының энергетика және ТКШ басқармасында дизель отынымен қамтудағы шиеленіс егін жинау науқанының басталуымен байланыстырады.
- Егін жинау науқанының басталуына орай жыл сайын республика бойынша дизель отынына тапшылық туындайды. Бірінші кезекте отынның мол көлемі ауыл шаруашылығы техникасына май құю үшін жұмсалады, сондай-ақ транзиттік көлік қозғалысы үшін қолданылады. Бұл мәселе әкімдіктің жіті бақылауында, - деп хабарлады басқармадан.

Айта кетер жайт, Маңғыстауда дизель отыны Атырау МӨЗ-нен келеді. Айлық тұтыну мөлшері шамамен 18 мың тоннаны құрайды. Өңірде бүгінде 2,5 мың тонна қор сақталған. Әкімдікте жөнелтілген дизель отынының мөлшері туралы ақпарат күн сайын берілетіндігін мәлімдеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.