6 желтоқсан - көрнекті мемлекет және қоғам қайраткері, қазақ әдебиетінің классигі, ҚР Еңбек ері Әбіш Кекілбайұлының туған күніне орай облыстық тарихи-өлкетану музейінде еске алу іс-шарасы өтті, деп хабарлайды mangystaumedia.kz.
Іс-шараға Маңғыстау облысы әкімінің орынбасары Ұлықбек Тінәлиев, ұлы Дәулет Кекілбаев, бұдан өзге өлкеге танымал зиялы қауым өкілдері қатысты.
Абыз рухын ұлықтау рәсімінде жиылған жұртшылық шығармашылық мол мұрасы мен өмір сүрлеуі, қызмет жолы өнеге-ғибратқа толы ғұлама жазушының тұғырлы ескерткішіне тәу етіп, гүл шоқтарын қойды. Бұдан соң облыстың бас имамы Әнуар қажы Елжанов қайраткер рухына құран бағыштады.
Н.Жантөрин атындағы облыстық музыкалық-драма театры әртістері дарынды суреткердің жүрдек қаламы мен ұшқыр қиялынан туған кейіпкерлерді сомдап, шағын театрлық қойылым қойды.
"Әбіш Кекілбайұлы - түбі бір түркі әлемінің мақтан тұтар тұлғасы. Абыздың қазақ өнері мен әдебиетіне сіңірген еңбегі өлшеусіз. Ұрпақ ретінде ортақ парызымыз - теңдесіз әдеби мұрасын өскелең ұрпаққа насихаттау",-деді Ұлықбек Тінәлиев.
Басқосуда Әбіш Кекілбайұлының тырнақалды туындылары топтастырылған жинақтың тұсауы кесілді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
