Ақтауда қоқыс уақытылы шығарылуда

Ақтауда қоқыс жинаумен айналысатын "Caspiy Operating" ЖШС жұмысшылары штаттық режимде жасауда, техникалар түгел жұмылдырылған, деп хабарлайды mangystaumedia.kz облыстық қоғамдық коммуникация орталығына сілтеме жасап.

Кәсіпорын директорының айтуынша, қоқыс шығаруда техниканың тозғандығы жиі кедергі болады.

"Күн сайын 6-7 бірлік техникадан ақау шығып, жөндеу жұмыстарына тұрып қалады. Ескі тариф бойынша жұмыс істегендіктен, біз шығынға ұшырап отырмыз. Автобөлшектерді сырттан алдырамыз, сондықтан қымбатқа шығады", - деді "Caspiy Operating" ЖШС Әділет Пірімқұлов.

Спикердің айтуынша, жазда сусындар, балмұздақ, фаст-фуд және басқа да заттарды тұтыну айтарлықтай артады. Сондықтан қоқыс контейнерлері тез толып қалады.

"Бүгін 8 тамызда барлық техника шығарылды, кәсіпорын штаттық режимде жұмыс жүргізуде, қоқыс шығарудағы кедергілер толығымен жойылды", - деп атап өтті Ә. Пірімқұлов.

Қала басшылығы тұрғындардан түсіністікпен қарауды сұрайды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.