«Маңғыстау Медиа» орталығына Маңғыстау облысы әкімінің орынбасарлары - Абзал Меңдібаев пен Бекбол Орынбасаров және қаржы басқармасының басшылары бар бір топ шенеунік бас сұқты. Орталықпен танысуға келе жатыр деп ойлаған қызметкерлер дайындалып, журналистер қоя алмай көкейде жүрген сауалдарын дайындап отырды.
Келген қонақтар бірден ғимаратты аралауға көшті. Негізгі сөз болған мәселе – ғимарат «Маңғыстау Медианың» жеке меншігі емес, мемлекеттікі. Сондықтан – бұл жерде туристер тамашалауға арналған қолөнер бұйымдарынан құралған көрмелер де орнатылуы қажет. Ол көрмелерге осы ғимаратты лайық деп тапқан.
Аймақтағы киелі қара шаңырақ «МаңғыстауМедиа» орталығына алғаш бас сұға тұрып, аталған азаматтардың қызметкерлерге жылы шырай танытпауы, олармен тұрпайы сөйлесуі журналистер шамына тиді. Күнде көре бермейтін әкім орынбасарына қойған сауалдарымызға «Қазір емес, уақытым жоқ» деген желеумен құтылуға тырысты. Ал өзі орталықтың қызметкерлеріне «МаңғыстауМедианың» жаңа ғимараты туралы сауалдарын асықпай қойды.
"Маңғыстау-Медиа" журналистері осы күнге дейін ескі ғимаратта отырғаны белгілі. Ол жерде интернет жүйесі де дұрыс тартылмаған, орталықтан шалғай орналасқандықтан журналистердің қатынауы да қиынға соғатын әр түрлі баспасөз шараларына. "3 шағын ауданда отырғанда жұмысымызға бір бас сұғып, жағдайымызды білгісі келмеген белсенді шенеуніктер енді жаңа ғимаратқа көз алартуда ма?! Қоғамның осал тұсын жөндеуге тырысып, халықтың мұңын жеткізуге тырысқан журналистерге осы ғимаратты да көп көргені ме?! Жоқ, аймақтың журналистерінде ала алмай жүрген өштері бар ма?!" дейді орталық журналистері. Аймақ журналистері деп айту себебіміз, "Маңғыстау Медиа" дегенде 1973 жылдан бастау алатын қара шаңырақты айтамыз. Бұл орталық Маңғыстау журналистикасының жылы мекені, ардагер журналистердің келіп тұратын жылы ұясы. Орталыққа 5 аудан, 2 облыстық, 1 қалалық газет, 1 облыстық сайт тиесілі болғандықтан, барлық дизайнерлер мен корректорлар ауданда емес, осы орталыққа біріктірілген.
Бір қызығы, 10 жыл қаңырап бос тұрған осы ғимарат "Маңғыстау Медиа" орталығы көшіп келген соң әкімдікке де қажет болып қалғаны ма? Шенеуніктердің бұл қылығын аймақ журналистикасына деген осындай құрметі деп танимыз ба?
Құрметті Маңғыстау облысының әкімі Нұрлан Асқарұлы! Қоғамның, халықтың сөзін сөйлеп жүрген журналистерге сізді араша түседі деген ойдамыз. Осы келеңсіз жайттың дұрыс шешімін тауып беруіңізді сұраймыз.
Кәмшат СӘРСЕНБАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
