Себеп, әрине біреу – бағусыз ауа жайылған малдың жолға шығып кетуі. «Айта-айта Алтайды, Жамал апам қартайды» демекші, жазыла-жазыла жауыр болған тақырып күн тәртібінен әлі күнге түспеуі, мәселенің шешімін таппай отырғанымен байланысты болса керек. Мал-жанды басудың алдың алу барлық уақытта мүмкін бола бермейтіні тағы белгілі, мұнда да 3 үй жануары пойыз астына түссе, бір адам өз абайсыздығы салдарынан қаза болған. Сонымен қатар, теміржол үстіне бөгде зат қойып кеткен бұзақылардың кесірінен 2 рет пойыз тоқтатылған.
Дегенмен, бұл өткен жылмен салыстырғанда аз. 2016 жылдың он айында машинистер 76 рет шұғыл тежеу беріп, 23 ірі қара малын басып кеткен. Жыл бойы тынымсыз жүргізілген профилактикалық жұмыстар нәтижесінде дерек былтырғы кезеңнен 30 ретке төмендеген.
– Жолға малдың шығуына байланысты тежеулер былтырғыға қарағанда қысқарғанымен, төрт түліктің иесін табуда қиындықтар әлі де бар. Көп жағдайда Маңғыстау локомотив депосының кезекшілері оқыс тежеу хабарламасын кешіктіріп береді. Мысалы, мал баспау үшін 14 наурызда Тамақ -№16 темір жол бекеті аралығында №2101 жүк пойызының шұғыл тежеуге барғанын – 1 күн, 14 мамырда Шетпе станциясы мен №13 темір жол бекеті аралығында № 2835 жүк пойызының жедел тежегішті басқанын – 2 күн, 3 қыркүйекте №13 – №12 темір жол бекеттерінің № 8-пикет тұсында №313 «Атырау – Маңғышлақ» жолаушылар пойызы жасаған тежеуді – 2 күн, 24 мамырда Өзен станциясы 179 км 1-пикетте №3403 жүк пойызының оқыс тоқтағанын – 1 күн кешіктіріп хабарлады. 29 қыркүйекте жергілікті уақытпен 22.55 сағатта Қызыләскер – Көкбекті бекетінде 1012 км 5-пикет маңында түйе малы басылған. Ол №319 «Душанбе-Мәскеу» жолаушылар пойызының алдына шыққан. Полиция қызметкерлері оқиға орнына барғанша түйенің екі құлағындағы электронды сырға кесіліп алынған екен. Үш күн іздестіруден кейін иесі белгілі болды. Яғни, хабар дер кезінде тәртіп сақшыларына жетпесе, малын темір жол маңына жіберіп, қозғалыс қауіпсіздігіне кедергі келтіретін шаруаларды анықтау, олармен жұмыс жүргізу бізге қиындай береді, – дейді бұл туралы желілік ішкі істер бөлімінің әкімшілік полиция бөлімшесінің басшысы Серік Оразғалиев өз пікірін білдіріп.
Тағы оқыңыздар: Шетпелік кәсіпкер туған ауылына спорт кешенін сыйладыОның айтуынша, желілік ішкі істер бөлімі теміржол мекемелеріне қажетті ұсыныстарын да беріпті. Өйткені теміржолдағы төтенше жағдай болған жерге біріншілерден болып баратын кім? Әрине – теміржолшылар.
Төрт түліктің теміржолда тайраңдап жүруінің бір себебі, қоршалған бөгеттердің сымдары үзілген немесе мүлдем қоршаулардың жоқтығы көрінеді. Әсіресе, Тамақ – №16 темір жол бекеті, Бейнеу – Оазис, Бейнеу – Үстірт, Үстірт – Сай-Өтес және № 11,12,13 темір жол бекеттері мен Шетпе станциясы аралықтарында қоршау жоқтығы жағдайды қиындатып отыр екен.
Шахида ЖҰМАН
Суретті түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
