Халықтың талабы ескеріле ме?

Сұйытылған мұнай газ нарығында 2005 жылдан бері қызмет көрсететін «LPG Trade» ЖШС компаниясы ауданымыздан газ толтырғыш станциясын салмақ. Алайда аудан тұрғындарының қарсылығына қарамай, ауыл іргесінен басталып кеткен бұл құрылыстың одан әрі дамуына аудан тұрғындары түбегейлі қарсы. Осы мәселе бойынша өткен аптаның сәрсенбі күні М.Атымов атындағы орта мектепте қоғамдық кеңес мүшелерінің тыңдауы өтті. Күн тәртібіндегі мәселе біреу-ақ. Шетпеден салынатын газ толтырғыш станциясының құрылысына жауапты мамандарды, рұқсат берген құзырлы орындарды тыңдау. Бірақ, өкінішке орай, қараша халықпен кездесуге жауапты мамандардан ешкім келе қоймады.

Шырылдап шындық іздеген бір қауым елдің мұңын еститін әзірге құлақ жоқ. Осылай деп шырылдаған бір топ тұрғын былтыр құрылысы басталған зауыт жұмысын мүлде тоқтатуын талап етіп отыр. Тұрғындар зауытта ашылатын жұмыс орны былай тұрсын, «Алтыннан да қымбат денсаулығымызды әлдебіреулердің пайдасына құрбан етуге жол бермейміз» дейді. Алайда, әуелден-ақ көпшіліктің келісіміне пысқырып та қарамаған меншік иелері құрылысты бастап та кеткен.

Хош. Жиналысқа көшейік. Күн тәртібіндегі мәселе бойынша сөйлеушілер көп болды. Қоғамдық кеңестің мүшелері мен қараша халықтың пікірі бір арнаға тоғысты, «Шетпеден салынғалы жатқан газ толтырғыш станция салыну жөніндегі заңды қоғамдық тыңдауы енді өтіп отыр, оның алдында мекеме басшылары заңсыз қоғамдық тыңдау өткізген. Заңсыз тыңдауда құрылысты жүргізетін жер орынды дәл ауылдың іргесінен таңдап берген. Біз бұған қарсымыз. Неге десеңіз, газ толтырғыш зауыты экологиялық жағынан да, адам өміріне қауіптілігі жағынан да бізге қолайлы емес», - десті.

Ауыл ақсақалы Шынжырбеков Көмек:

«Осыған дейін каръер жырын жырлап келдік, сол каръерден шыққан шаңнан шеккен азабымыз жетерлік еді. Енді мына «Газ толтырғыш стансиясы салынады» деп ауыл тұрғындарының әбден мазасы қашты. Ол зауыттың ауылдан 500 қадам жерден құрылысы басталып кетті. Қазірдің өзінде құрылыс басында 100, 120 тондық 7 цистерна тұр. Жел жағымыздан келетін газдың да иісі бізге мәз емес. Егер алда-жалда газдан өрт шығатын болса, Арыста болған жарылыстан да жаман болайын деп тұр, Құдай бетін әрі қылсын. Сақтықта қорлық жоқ. «Сақтансаң сақтармын» деген біздің мақсатымыз зауыд жұмысын толық тоқтату емес, ауыл іргесінен қашықтау жерге 13, 14 разъездге қарай ысыруын талап етеміз. Егер халықтың талабын қанағаттандырмаса, біз бұл істің нәтижесін алу үшін Президентке дейін шағымданатын боламыз. Өйткені бұл жерде жәй нәрсе емес, халықтың тағдыры тұр, халықтың денсаулығы мен қоршаған ортаға әжептәуір залал келтіріп, табиғат байлығын тиімсіз пайдаланғалы отыр. Зауыт салынғаннан кейінгі келген залалды айтып шағымданғанша, басталмай жатып тоқтату керек. Адам өмірі ойыншық емес, одан бөлінетін улы газды халық жұтуға тиісті емес, әрі халық бірауыздан қарсы болып отырған зауытты қалай іске қоспақшы, сонда біздің сөзіміздің далаға ұшқаны ма? деп шағымданды.

— Аудан орталығында халыққа қызмет ететін, елдің тұрмыс-тіршілігін жеңілдететін кәсіпкерлік нысандарының бой көтергеніне қарапайым азаматтардың ешқандай қарсылығы жоқтығын бәріміз де білеміз. Ал қажеттігі де, қауіпсіздігі де күмән туғызатын, аудан халқына еріксіз танылған өндіріс ошақтарын біздің жатырқай қабылдағанымыз да деректі орындарға түсінікті болуы керек шығар. Жаралғалы шаңнан көз аша алмай отырған «Жаңа Орпа» ауылының тұрғындарына қайдағы бір газ толтыру станциясын елдің іргесінен тапа-тал түсте сала бастауы бұлтсыз күнгі найзағайдай әсер еткені рас. Қазіргі үрдіс бойынша елді мекендерде салынатын кез-келген құрылыстың жобасы халықтың талқысына беріліп, қоршаған ортаға әсері, одан ауаға шығатын, далаға төгілетін немесе көмілетін өндіріс қалдықтарының шекті мөлшерін жіліктеп, талдап түсіндіріп барып, рұқсат алынады. Біздің жағдайымызда мұндай шаралардың бірде-бірі орындалмастан құрылыс жұмыстары қарқын алып барады. Халық ат төбеліндей адам қатынасқан қоғамдық тыңдаудың құпия келісім бергеніне алаңдап отыр. Жария тыңдау өткізу жөніндегі ұсынысымыз, халықтың жанайқайына жауап бергенін қалаған тілегіміз аяқ асты болып қалды, ауылдың белсенді азаматтары құрылыс жұмысының дереу тоқтатылғанын қалайды. Мәселе облыс көлемінде де бақылауға ұсынылды. Құзырлы мекемелердің мамандарынан құрылған комиссия халықтың, болашақ ұрпақтың денсаулығына қатысты келелі проблема туралы тиісті қорытындысын береді деп үміттенеміз, - дейді аудандық қоғамдық кеңестің төрағасы Күбірбай Ұзақбай.

Қалай дегенмен, тұрғындар денсаулығы, халық мүддесі —бірінші орында! Бұқара да, билік өкілдері де қоршаған ортаға зиянды болатын кәсіпорынның жұмыс істеуіне жол бермейтіндеріне бірауыздан дауыс берді.

Айгүл РАХМЕТОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.