Құрықтағы кәріз жүйесі әуелден бір шешімін таппаған өзекті сұрақ еді. Қашан көрсең, септик тасып, шу болады да жатады. Тұрғындар да ағынды кәріз суларын уақтылы шығартып отыруға салғырттықпен карайды. Талай ауыл азаматы осы мәселені көтеріп, шағым айтып, пост жариялаған.
Талай арыз-шағымға жауап беріліп, қолдан келген шара алынып та жүрді.
Былтырдан бері Аман Бексариев деген азамат ауыл ішіндегі тасыған септик туралы жазып, видеосын жариялап жүрді. Осындай сын-пікірлер ескеріліп, септиктің суы алынып, маңайы тазартылғаны туралы суретті пост-жауаптар да берілген. Қазан айының соңында Асқар Имағанбетов деген ауылдың белсенді жасы 3 ш/а 5-6 үй тұрғындарының жанайқайын жеткізді. Ол кезде әкімдік «Тұрмыс-сервис» мекемесін жұмылдырып, аталған үйлердің лас су құдығын ауыстырып, кеңейтіп салып бергені туралы хабарлаған кезде:
- Қашанғы тасып аққан суды топырақпен көміп өмір сүреміз? Осы ауылдың кәріз жүйесі қашан реттелер екен, - деген сауалды журналист ретінде мен де қойғанмын.
Сол кезде жауапты басшылар маған:
- Кәріз жүйесін бірізді болдырып, ауыл арасындағы құбырларды бір жүйеге қосып, ары қарай құбыр арқылы сыртқа шығартып, лас су тоғанын реттеу мәселесін қолға алдық. Бұл біраз қаражатты және уақытты талап ететін мәселе. Ары қарай кезең-кезеңімен жасалатын болады, деп жауап берген. Иә, жасалған жұмысты жоққа шығармаймын, бірақ аяғына жетпей, айдалада қалғаны қалай?
Не себепті ары қарай жалғаспай, кідіріп қалды? Осы сауалға жауап іздеп жүргенде, Бек Мұханбет інім мәселені төтесінен қойды.
Әкімдік дер кезінде жауап беріп, мұның уақытша мәселе екенін, ары қарай жұмыс жанданып, жалғасын табады, теңіз бен аталған көлшіктің арасы алшақ, алаңдауға негіз жоқ, дегенді айтты. Дегенмен, мәселе ушығып, телеарна да шақырылды. Телеарна тілшісіне де аудан әкімінің орынбасары Г. Қылаубаеваның берген жауабын естідік. Міне, сондықтан әліптің артын бағып, мәселенің мән-жайына тоқталғанды жөн көрдім. Аталған ағынды су ауыл сыртында бір шұқырға жиналып жатыр. Жан-жағы қоршаулы. Бүгінгі жағдай міне, осындай.
Шынар КЕНДІН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
