Қызылтөбе ауылына қоқыс контейнері қашан келеді?

Мұнайлы ауданына қарасты Қызылтөбе ауылдық округінің және Қызылтөбе-2 тұрғын массивінің көшелерінде қоқыс контейнерінің орнатылмағанына бірнеше жылдың жүзі болған.

Ауыл тұрғындары қоқыс контейнерінің жоқтығын айтып әлек. Тұрғындардың айтуынша, олар қоқысты аула сыртына шығарады. Сол жерден тазалық мекемесі алып кетеді. Ал бұл тұрғындар үшін тиімсіз, өйткені даладағы қоқысты көбіне ит шашып тастайды. Кейбір тұрғындар қоқыс үшін өздері бөшке дайындап қойған. Ал енді бірі қоқысты тастау үшін аудан орталығына баратын көрінеді. «Ауылда контейнердің қашан болғаны есімізде жоқ» дейді тұрғындар.

Осы мәселе бойынша бұдан 4 ай бұрын аудан тазалығына қатысты мердігер мекемелермен байланысып, мән-жайды анықтаған едік. Мекеме басшыларынан «қоқыс контейнерлерін қою әкімдіктің құзырында» деген жауап алдық.

Ал 1 қазан күні аудан әкімінің қатысуымен өткен брифингте қоқыс мәселесі жөнінде сөз қозғағанда Рахат Елтизаров былай жауап берді:

- Қызылтөбеде тұрғындар қоқыс контейнерін өз аулаларына кіргізіп қояды. Ұрланған жағдайлар да болды. Сол себепті ол ауылда контейнер жоқ. Қазіргі уақытта Қызылтөбе ауылына 150 контейнер бөлінді. Жалпы ауданға 500 дана контейнер алынды.

Одан бері 4 айға жуық уақыт өтті. Қызылтөбе ауылының тұрғындары 150 контейнер тұрмақ, 15 контейнерді әлі көрген жоқ.

170 мыңға жуық тұрғыны бар бұл аудан үшін қоқыс мәселесін шешу оңайға соқпай тұр. Бұл ауданда қоқыс контейнері тек Қызылтөбе ауылдарында ғана емес, Маңғыстау селосының кейбір көшелерінде де жоқ болып шықты. «Тұрғындар қоқысты өртегендіктен, контейнердің тозығы жетіп, оны алып тастауымыз керек болды», - деді аудан әкімі Рахат Елтизаров. Бұл Рахат Тезекбайұлының 1-қазанда өткен брифингте берген жауабы еді. Ал контейнерлер енді келмеске кеткен сыңайлы.

Әкім сөзінен соң «тұрғындар қоқысты не үшін өртейді?» деген сауал туындайды. Осы тұрғыда пәлен деп тон пішу де қиын болып тұр.

«Әр ауылда 30 мыңдай халық тұрғандықтан, қоқыс контейнерлері жетіспейді. Алайда, ауылдарға қоқыс контейнерлерін қою үшін жұмыстанып жатырмыз», - деп сендірді Мұнайлы ауданы әкімінің орынбасары Нұрлыбек Жолбаев. Бұл аудан әкімінің орынбасары Нұрлыбек Жолбаевтың өткен жылдың қыркүйек айында берген жауабы. Ал ауданда осы уақытқа дейін қоқыс контейнері азаймаса, көбейген жоқ.

Айта кетейік, қазіргі уақытта Маңғыстау және Атамекен ауылдарына «Тазалық Мұнайлы» мекемесі, Басқұдық ауылына «Мұнайлы қызмет» мекемесі, Қызылтөбе ауылдарына «Атамекен тазалық» мекемесі қоқыс жинау қызметін көрсетеді.

Ал тазалық жұмысымен айналысатын мердігер мекеме басшыларының айтқанына сенсек, тұрғындар қоқысты «қалай болса, солай» тастап, лас су мен мал шаруашылығының қалдықтарын да контейнерге қалдырады екен. Осы орайда қоқыс контейнерлері тұрмыстық және құрылыс қалдықтарына арналғанын айта өтейік.

Одан бөлек, мердігер мекеме басшылары тұрғындардың 50 пайызға жуығы қоқыс үшін уақытылы төлем жасамайтындарына көңілі толмайды.

- Әйтсе де, тазалық жұмыстарын тоқтатқан жоқпыз. Тек тұрғындар тарапынан да түсіністік болса екен деген тілегіміз бар, - дейді «Тазалық Мұнайлы» мекемесінің директоры Сүйіндік Риза.

Сонымен, Мұнайлы ауданының тұрғындары қоқысқа қатысты мәселе бойынша әкімдікке арыздана алады. Арыздану үшін барған жағдайда өзімен бірге мердігер мекемемен жасаған келісімшарты болуы тиіс.

Тұрғындардың арызын әкімге жеткізген тілшіге Рахат Тезекбайұлы арыз-шағымы бар тұрғынның әкімдікке келуі керек екенін айтты. Осы тұста бір мәселенің шешілуі үшін міндетті түрде даудың басталуы керек пе деген пікір ойға орала кетеді. Мұнайлы өлкедегі Мұнайлы ауданында қарапайым қоқыс контейнерінің болмауы кімге сын?

Махаббат НҰРЖАНҚЫЗЫ

Суреттер автордан

Маңғыстау Медиа

Редакциялық пікір мақала авторлары мен оқырмандардың пікірлерімен сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты / Мнение редакции может не совпадать с мнением авторов статей и читателей. Ответственность за достоверность изложенной в статьях и комментариях информации несут авторы.