Сенат депутаттары Түпқараған ауданына келді

8 қаңтар күні Түпқараған ауданымызға ҚР Парламенті Сенатының депутаттары – Балабай Ақбердіұлы Шелпеков пен Михаил Михайлович Бортник келді. Облысқа қарасты аудандардың ішінде ең бірінші сапарларын біздің ауданнан бастаған депутаттарға аудан депутаттары бірнеше ұсыныстар айтты.

Жұмыс барысымен келген сапарларында Сенат депутаттары мұғалімдердің мәртебесін көтеру туралы қабылданған Заң және 2020-2025 жылдарға арналған денсаулық сақтау саласын дамытудың бағдарламасы туралы кеңінен айтып өтті. -Медицина саласына басқа жылдарға қарағанда бюджеттен көп қаржы бөлінетін болды. Мысалы, бұрын жүрек оталары тек Нұр-Сұлтан қаласындағы орталықта жасалатын болса, бүгінде әр облыс орталығында бұл оталар жасалып жатыр. Дәрігерлер шетелде білім толықтырып, тәжірибелер алмасты. Ғимараттар жөнделуде, түрлі техникалар жаңартылуда. Бұл үлкен жетістік. Ендігі мәселе - онкологиялық аурулардың асқынуы болса, Президент Қ.Тоқаев бұл мәселелердің алдын алуға жүйелі жұмыс жүретінін айтты, - деген Б.Шелпеков ауылдардағы дербес бюджет, шағын және орта кәсіпкерліктің 3 жылға дейін мемлекеттік салықтан босатылатыны туралы, елдімекендерді сумен және газбен қамту мәселелерінің еліміз бойынша жасалып жатқан жұмыстары жайын баяндады.

- Ел ішінде көп жүреміз, жергілікті жердегі халықтың ауыртпашылығын бірге көтеріп келеміз. Көп балалы аналарға берілетін төлемдерді «жәрдемақы» емес, мемлекеттің демографияға қосқан үлестері үшін «Сыйақы» деп ауыстыру керек деп есептеймін. Себебі, әр баланы дүниеге әкелу оңай деп кім айта алады? Екіншіден, бір бала болса да, төрт бала болса да – бала. Сондықтан - жәрдемақы барлық балаларға берілгенін жөн санаймыз. Мемлекетте негізгі ұлт саны көбейсе қазақ тілінің мәртебесі өседі, - деген аудандық мәслихаттың хатшысы Айкүміс Досанова ұсыныс айтты. Одан бөлек, Форт-Шевченко қаласынан қала атауын алып тастау туралы көтеріліп жүрген мәселеге өз көзқарасын білдіріп: - Форт-Шевченко қаласы Маңғыстау өңіріндегі ең алғашқы қала. Бір кездері 20 мың халқынан 4 мыңдай ғана қалған кездер де болды. Қазір қайта жанданып, дамып келеді. Қалаға тән әлеуметтік нысандары да бар. Қаладағы тұрғындардың санымен емес, әлеуметтік жағдайына қарап, атағын сақтап қалуын қалаймыз, - деді.

Аудан әкімі Айдос Хамиев аудан бойынша өткен жылы атқарылған жұмыстарға қысқаша баяндама жасады. Оның ішінде ауданда салынып жатқан жеке тұрғын үйлердің құрылысын, мектеп және жаңадан ашылған әлеуметтік нысандарды атап кетті. Ауданға инвестиция тарту және жұмыс орындарын ашу бағыты күн тәртібінен түспейтін жұмыстар екенін де жеткізді. Аудан активтерімен кездесу жиынынан кейін депутаттар Е.Өмірбаев орта мектебінің ұжымымен және кезінде Елбасы Н.Назарбаевтың лентасын қиған аудандық емхана қызметкерлерімен кездесіп, жаңалықтармен бөлісіп, ұжымдардың мәселелерімен танысты.

Клара ҚАНСҰЛТАНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.