Ақтауда халыққа қызмет көрсету орталығында азаматтардың цифрлық сауаттылығын арттыру мақсатында БАҚ өкілдеріне арналған тренинг өтті. Онда “Азаматтарға арналған үкімет” мемлекеттік корпорациясы” коммерциялық емес акционерлік қоғамының Маңғыстау облысы бойынша филиалының қызметкерлері журналистерді egov.kz сайты, eGov mobile қосымшасы, EgovKzBot телеграм-ботымен жұмыс жасау барысымен таныстырды.
Филиал директорының орынбасары Айбек Мұзбаевтың айтуынша, қазіргі таңда көптеген қызметтерді, мысалы, жүргізуші куәлігін ХҚКО-ға келмей-ақ egov.kz сайты арқылы алуға, ақысын да онлайн төлеуге болады.
— Қазір барлығы халық игілігіне, олардың уақытын үнемдеу үшін жасалып жатыр. Енді біздің орталыққа келіп, кезекті тұрудың қажеті жоқ. Тіпті жүргізуші куәлігін сайт арқылы ала аласыз, суреттіңізді кез-келген жерде түсіріп, сайтқа қолтаңбаңызды жүктей аласыз. Орталығымызға тек куәлікті алып кетуге келесіз, — дейді Айбек Нұрғалиұлы.
Оның сөзінше, былтырдан бастап ХҚКО-да цифрлық кабинет жұмыс жасайды. Онда әрбір азамат өзінің цифрлық сауаттылығын арттыра әрі оны растайтын сертификатқа ие бола алады. Сонымен қатар қаладан шалғай аудандарға халықты қызметтерді онлайн алу жөнінде ақпараттандыру мақсатында мобильді ХҚКО барады.
Қазіргі таңда атаулы сайтта 600-ден астам қызмет, телеграм-ботта 25, мобильді қосымшада 28 ең көп сұранысқа ие қызмет қолжетімді.
Семинар соңында оннан астам маңғыстаулық журналист тренингті өткендігі жайында сертификатқа ие болды.
Арай ЖАУПЕРОВА
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
