Бүгін «Nur Otan» партиясының өкілдері «Ардагерлерді ардақтайық» жобасы аясында ардагер журналист, Ақтау қаласының құрметті азаматы, ҚР Журналистер одағының мүшесі Есберген Іңірбайұлын 70 жасқа толуымен құттықтады, - деп хабарлайды mangystaumedia.kz сайты.
Ардагер журналист Есберген Іңірбайұлына облыс әкімі Серікбай Трұмовтың арнайы құттықтау хаты табысталды.
Сонымен қатар Ақтау қаласының әкімі Нұрлыбай Қилыбай мен «Nur Otan» партиясы Маңғыстау облысы филиалы төрағасының бірінші орынбасары Елубай Әбілов ақжарма тілек айтып, жылы лебізін жеткізді.
«Мерейтойыма арнайы құттықтап келген қала әкіміне, Nur Otan» партиясының өкілдеріне, қоғамдық ұйымдардың басшыларына алғыс айтамын. Жетпіс жасқа келгеннің өзі – үлкен белес. Артқа көз жүгіртіп өзіңе есеп беретін кезең екен. Қолға қалам алған сәттен бастап Маңғыстау тарихын, соғыстағы маңғыстаулық батырлардың ерлігі жайлы туындылар жазып, кітап шығардым. Жас ұрпақ осының барлығын оқи отырып, ерлік көрсеткен батырлардың бойынан патриоттық рух, күш-жігер алады деген ниетпен жаздым. Әлі де жазып келе жатырмын. Елге қызмет ету – әр азаматтың парызы. Сондықтан туған халқыма, тіліне, тәуелсіздігіне әлі де үлесімді қосып, күш-қайратым жеткенше еңбек еткім келеді», - дейді журналист Есберген Іңірбаев.
Есберген Іңірбайұлы журналистика саласында 52 жыл жемісті қызмет етті. Алғашқы еңбек жолы Красноводск аудандық «Жұмысшы» газетінен басталды. Содан кейін «Ақкетік арайы» газетінің редакторы, облыстық телеарнада төрағаның орынбасары, «Nur Otan» партиясында идеология бөлімінің меңгерушісі қызметтерін атқарған. Оның мақалалары облыстық, республикалық деңгейдегі басылымдарда жарық көріп тұрған.
Қалам мен қағазды серік еткен журналист Ұлы Отан соғысы жылдарын өз шығармашылығында арқау еткен. Атап айтқанда «Боздақтар», «Соғыстан қайтқан солдаттар», «Маңғыстау батырлары», «Он сегізде от кешкендер», «Қаһарманы ұлы қазақтың» және т.б кітаптары бар. Жақында батырларды насихаттау мақсатында «Есімдері елдің есінде» атты кітабы тағы жарық көрді. Айтуынша, бұл кітапта батырлар ұрпағынан алған сұхбаттары мен естеліктері жазылған.
Жұлдызай ҚАЛИЕВА
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
