Денсаулық сақшыларына ризамын

Бұрын көп жайттарға назар аудармаппыз. «Ата-ананың қадірін балалы болғанда білерсің» демекші, дәрігердің қадіріне денсаулық бұзылғанда ғана жетеді екенбіз.

Менің отбасым Ақтау қаласындағы «Нейрон» емханасында тіркелген. Жоғарғы шағын ауданда тұратындығымызға қарамастан тіркеген клиника басшыларына рахмет. Мұндағы медицина қызметкерлеріне де ризамыз. Әсіресе, отбасылық дәрігеріміз Жұпар Батыр, балалар медбикесі Ұлдана Серікбаева мен медбике Шынар Жолдыбайқызына айтар алғысым шексіз.

Дәрігеріміз Жұпар Сағадатқызы Астана медицина университетін терапевт мамандығы бойынша тәмәмдаған. Ал Ұлдана Серікбаева Тараз қаласындағы «Болашақ» колледжін мейірбике мамандығы бойынша бітірсе, Шынар Жолдыбайқызы Ақтаудағы «Меридиан» медициналық колледжінің түлегі. Клиникаға қашан барсақ та, олар алдымыздан құрақ ұшып қарсы алып, айтқанымызды ден қоя тыңдап, мұқият тексеріп, тиісті ем жазып беріп, кеңес айтып, күліп шығарып салады. Менің бір балам осында есепте тұр. Ақ халатты абзал жандарымыз есепте тұрған балаларға тиесілі дәрі-дәрмектерді уақытында беріп, хал-жағдайымызды жалықпай сұрап отырады. Денсаулығы сыр беріп, көңіл-күйі түсіп барған науқастарға осындай білікті мамандардың жайдары жаздай қалпы медициналық қызмет көрсеткенінің өзі шипа емес пе?

Балаларымызға да, өзімізге де қалтқысыз қызмет етіп, өздерінің қастерлі борыштарын тиянақты атқарып жүрген осынау денсаулық сақшыларына шексіз алғыс айтамын. Халық денсаулығы жолындағы адал еңбектеріңіздің жемісін жиып, бақытты, ұзақ ғұмырлы болғайсыздар.

Жайна УРЛЕПБАЕВА,
Ақтау қаласы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.