Қала тұрғындары сайлауда белсенділік танытып жатыр

Бүгін қала тұрғындары ҚР Парламенті Мәжілісі мен Мәслихат депутаттарын сайлауда белсенділік танытып жатыр. Сайлаушылар таңғы сағат 07:00-ден бастап өз сайлау учаскесіне келіп, дауыс беруде.

Белсенді тұрғынның бірі - Ахмет Салманов. Ол № 31 сайлау учаскесінде ең бірінші болып дауыс берді.

Сондай-ақ 13 шағынаудандағы №17 мектепте орналасқан №28 сайлау учаскесіне барған болатынбыз. Сайлау учаскесі санитарлық талаптарды сақтап, дауыс берушілерді қарсы алып тұр. Алдымен таңдау жасауға ерте келген егде жастағы тұрғындарды аңғардық. Содан соң жастардың қатары артты.

Алтын Бүркітова, қала тұрғыны

– Сайлауға ерте келіп өз таңдауымды жасадым. Сайлау әділ өтсе екен деймін. Ата-ана ретінде балаларымыздың болашағы жарқын болуын, елдің көркеюін қалаймыз. Осындай тілекті арқалап, бүгін дауыс бердім.

Аманбек Сүндетов, Сара Әлишова, қала тұрғындары

– 13 шағынауданның тұрғынымыз, 73 жастамын. Бүгін, міне, біз алғашқылардың бірі болып өз таңдауымызды жасадық. Енді қорытындысын күтеміз. Халқымызға, елімізге тыныштық тілейміз. Бәрі ойдағыдай, жақсы болады деген ойдамын.

Айнұр Аллабергенқызы, қала тұрғыны

– Мен азаматтық борышымды өтеп, дауыс беруге келдім. Әрбір азамат сайлауға келуге міндетті. Бұл Қазақстанның болашағы үшін, өзіміз үшін өте маңызды деп ойлаймын. Сондықтан да бүгін өз таңдауымды жасадым.

Әлібек Дүйсен, қала тұрғыны

– 10 қаңтар еліміз үшін өте маңызды күн. Отбасыммен бірге ерте дауыс беруге келдік. Балаларымды да сайлауға ала келдім, себебі сайлаудың қаншалықты маңызды екенін білуі керек. Сайлаудан кейін елімізде жақсы өзгерістер болсын деп тілеймін.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.