Н.Жантөрин театрының директоры тағайындалды

Н.Жантөрин атындағы Маңғыстау облыстық музыкалық драма театрының директоры қызметіне Гүлсина Бақытжанқызы Мерғалиева тағайындалды, - деп хабарлайды mangystaumedia.kz сайты.

Мерғалиева Гульсина Бакаджановна 20.02.1975 жылы Ресей Республикасы, Самара облысы, Большечерниговский ауданы, Кошкин кентінде дүниеге келген. Әкесі – Бақытжан трактор бригадирі, анасы мәдениет саласында көп жыл қызмет етті. Анасының мәдениет саласында жұмыс істеуі Г.Мерғалиеваның өнер жолын таңдауына тікелей әсерін тигізді. Отбасында барлығы дерлік өнер жолын таңдаған жандар.

1982-1992 жылы Августоский атындағы мектептен орта білім алды. 1995-2000 жылдар аралығында Алматы қаласындағы Т.Жүргенов атындағы Қазақ Ұлттық Өнер Академиясында «драма режиссеры» мамандығы бойынша Маман Байсеркенов шеберханасында білім алды.

Шығармашылық жолын Көкшетау қаласындағы Ш.Құсайынов атындағы Ақмола облыстық драма театрында қоюшы режиссер қызметінен бастады.

2002 жылы арнайы шақырумен Маңғыстау облыстық музыкалық драма театрына көркемдік жетекші әрі бас режиссер қызметіне тағайындалып, содан бері осында үздіксіз еңбек етіп келеді. Театр ірге тасын қалаушылардың бірі.

2004 жылы қаңтар айында «Тарлан» тәуелсіз сыйлығының лауреаты.

2006 жылы «Қазақстан Республикасының еңбек сіңірген қайраткері» құрметті атағын иеленді.

2017 жылы «Нұрмұхан Жантөрин» атындағы алтын төс белгісінің иегері болды.

Гүлсина Мерғалиева еңбек еткен жылдар ішінде өзінің ұйымдастырушылық іскерлігімен, жемісті шығармашылық қызметімен танылды. Ол көптеген республикалық, халықаралық деңгейдегі әртүрлі фестивальдар мен конкурстарға белсенді түрде қатысып, лауреат, дипломат, жеңімпазы атануда. Сонымен қатар аудандық, облыстық ірі шараларды ұйымдастыру мен өткізуге қосқан үлесі үшін Мәдениет басқармасының, облыс әкімінің Алғыс хаттарымен марапатталып жүр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.