Әскери теңіз күштерінде тәрбиеші офицерлердің мерекесі өтті

Әскери-теңіз күштерінің жеке құрамы ҚР Президентінің 1993 жылы 19 қаңтардағы №1084 Жарлығына сәйкес ҚР ҚК командирлердің (бастықтардың) тәрбие және әлеуметтік-құқықтық жұмыстар бойынша орынбасарлары институты құрылған күніне 28 жыл толуына арналған салтанатты жиын өткізді.

Салтанатты жиынға Әскери-теңіз күштерінің бағынышты бөлімдері мен бөлімшелері және кеме командирлерінің тәрбие және идеологиялық жұмыстар жөніндегі орынбасарларының қатысты.

Шара барысында қатысушыларға Қарулы Күштердің, оның ішінде тәрбиеші-идеолог офицерлер институтының тарихы таныстырылды, даму тарихына ат салысқан алдыңғы буын аға офицерлердің еңбектері бейне материалда көрсетілді.

«Сонымен қатар тәрбие және идеологиялық жұмыстардың әр алуан салалары бойынша, яғни жеке құрамды психологиялық дайындық, әскери тәртіп пен идеологиялық жұмыстардың бағыттары бойынша баяндамалар оқылды. Оның үстіне қызметі сан қырлы болып келетін Әскери-теңіз күштеріндегі тәрбие және идеологиялық жұмысты ұйымдастырудың ерекшеліктері мен қазіргі заман талабына сай шешімін табатын түйінді мәселелер қарастырылды», - дейді Ақтау гарнизоны баспасөз қызметінің бастығы капитан Шалабаев Нұрбол.

29011 әскери бөлімінің командирі 2 дәрежелі капитан Данияр Хайрушев «Тәртіпке бағынған құл болмайды» - деп батыр Бауыржан Момышұлының сөзін келтіре отырып, жауынгерлік дайындықты жоғары ұстау үшін әскери тәртіптің мықты болуының маңызын айтты, қызмет барысында ынта-жігері мен үлгілі тәртібі үшін көзге түскен тәрбиеші-идеолог офицерлерді бағалы сыйлықтар және мадақтамалармен марапаттады.

Салтанатты жиын соңы Абай Құнанбаевтың 175 жылдығына арналған іс-шарамен ұласты. Барлық санитарлық-эпидемиалогиялық талаптарды сақтай отырып Нұрмұхан Жантөрин атындағы Маңғыстау облыстық Музыкалық драма театрында өткен «Құнанбай мен Абай» сырласу атты спектакльдің премьерасын тамашалады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.